絕種好司機？不慎輕碰前車留靚字跡紙條道歉　網民反質疑有古怪

勇於認錯是美德，對於駕駛者來說就更加難得！網上流傳一張照片，有司機泊車時不小心輕碰前車的保險桿，雖然表面來看沒有異樣，但他仍然留下一張紙條道歉，並寫上聯絡方法，其負責任的做法獲網民大讚，形容是「香港恐龍呀！絕晒種」。

有女網民在facebook群組上載有關照片，並大讚「值得表揚！有品」。從照片可見，有車輛的擋風玻璃被夾着一張紙條，上面寫有「杜先生」的字跡：「Sorry呀，我泊車輕輕掂到你後Bumper（保險桿）」，他指自己先檢查一次未見有劃花的痕跡，並留下電話號碼承諾「如果你發現有問題可以聯絡我」。

網民都紛紛大讚「杜先生」有責任心，誠實有禮，直言這類人在香港地極其罕見，「絕晒種，竟然留便條」、「如果我係車主，冇事嘅話我唔理算，肯負擔嘅人畀讚」、「好有承擔，可以嫁了」，亦有人錯重點稱「杜生手字好靚」、「睇手字就知道係有文化嘅人」。有網民笑言，對方或許知道樓主是女司機，「溝女伎倆，唔好咁天真」、「見個司機係靚女，我都會咁做啦」。

不過有網民就認為現今「好人難做」，留下電話承擔責任隨時被敲一筆，「試過你就知，新舊都入你數，求求其一開口就八千一萬」，亦有人質疑是否騙案，「呢招高，之前如你車頭有留電話就打去你電話到講同一樣嘢，而家到佢留電話等你上釣」。