不敵貴租　「浸大飯堂」點心居結業　學生送別：跟它一起畢業

有8年歷史、被譽為「浸大飯堂」的點心居，突然於2月6日凌晨結業，不少浸大生均感驚訝。數十人於營業最後一天特意前來送別。點心居老闆張先生接受《香港01》訪問時感謝食客多年來支持，稱「其實唔捨得㗎，不過無辦法」。

十個浸大生，大概有八個都幫襯過九龍城的點心居，既喜歡店內名物流沙奶黃包，又愛普通的一盅兩件如蝦餃燒賣，可堪稱「浸大飯堂」。可惜點心居1月31日突然在facebook宣佈昨日（周日）結業，浸大人隨即「哀鴻遍野」。有將近畢業的浸大生投稿至「HKBU Secrets」facebook專頁，形容是跟點心居一起畢業，「點心居的消失都打響我哋都即將要離開的鐘聲。再見點心居，同時都準備同浸會大學講再見了」。

數十浸大生前來送別

昨晚是點心居的最後營業日，晚上7時，店外開始聚集了數十個年輕客人，大家都知悉此晚在這裏吃的就是點心居的最後點心，所以紛紛在店外跟招牌合照，又親切跟老闆道再見。有年輕人依依不捨，在門外邊等位邊跟店員閒談，店員笑笑口大聲說：「我認得你，你之前成日嚟㗎嘛。」

老闆：其實唔捨得㗎，不過冇辦法

即使是最後一天，坐滿十多枱人的店裏都沒有離愁別緒，還是如常一片聊天吵雜聲，夾雜拍枱及哈哈大笑聲，食客還是一貫地「相機食先」，只是這天手機的咔嚓聲較平日多。大家都希望在逗留短短的一小時裏，以歡笑留作最後的回憶。老闆有時坐在收銀處忙著收錢，有時趕忙從夥計手中接過新鮮滾熱辣的點心，也一邊幫忙落單，一邊講及數款點心已經售罄。

「因為唔好浪費食物，所以我都同廚房嗰邊講，照番正常運作去做。」老闆忙裏偷閒，走到店外跟記者說。「其實唔捨得㗎，不過冇辦法。租金太貴喇，同埋所有人工呀成本都加咗好多，所以支持唔住。」

熟客：搭小巴會叫「點心居落」

在九龍城屹立八年，有五年在大街渡過，其後搬至街尾角落，仍然逃不過結業厄運。老闆說租金實在難以負擔，雖然搬離大街後，店舖亦稍為大了，但位置變得「隔涉」。特意前來重遊舊地的浸大畢業生李小姐說，以前搭小巴會叫「點心居落」，認為點心居是九龍城的標記（trademark），搬舖後位置較偏遠，「以前一落小巴就係，依家一落小巴仲要再行多條街」。

不忍舊物消失而開店　卻同遭淘汰

點心居著名的有鵪鶉蛋燒賣、鮑魚燒賣、椰香黃金糕等等懷舊點心，原來基於老闆不忍舊物不斷消失，「好多酒樓、好多懷舊嘅嘢都已經俾人淘汰咗，始終九龍城都係老街坊多，所以都想做番啲懷舊啲」。小小店舖，提供逾五十款點心，但平均價錢都只是二十元一碟，茶芥也只是四元一位。

問老闆為何不加價，他說「其實我哋都係夠成本、夠開支。我哋主力係街坊，所以價錢都係偏低。」價格相宜再加上人情味濃郁，難怪浸大人無不喜愛有加，老闆說，自從在facebook宣佈結業後，這幾天生意多了四、五成，「好多謝啲街坊朋友支持、專登落嚟食，變咗好多嘢（晚上9時許）都已經賣晒。嚟到冇晒嘢食我都唔好意思」。

浸大舊生：12點幾開完會落嚟飲茶就正

食物價錢平味道好，但成為「浸大飯堂」的要訣在於收得夜，開得早。當跟一眾Floormate打機談心到凌晨，突然好想醫肚；當與莊員做莊務到天昏地暗，想食點東西再抖擻精神奮鬥，落九龍城只是15至20分鐘的腳程，既方便又快捷。深宵營業的，除了24小時麥記，還有凌晨2時半收舖、早上6時再營業的點心居，「食完個感覺係冇咁油膩，係舒服啲嘅。12點幾開完會落嚟飲茶就正。同埋呢度有啖茶飲吓，吹水都舒服啲。」鄭先生回憶以往學生生涯說。老闆也指同區的夜市選擇不多，「寧願做夜啲，分兩批人去做」。

點心師傅：我都有啲唔開心

本預料凌晨2時關門，但因為點心不斷賣斷，到晚上10時多，店員已經跟剛來到的客人致歉，著他們到其他地方食飯。11時許，點心居清場，老闆跟一眾員工坐下聊天，分派剩餘物資。忙碌了整天，大廚跟記者說任職點心居有歸屬感，「成間啲貨係我叫，全部調味我自己做，啲餡蝦餃餡呀牛肉全部都係我整」，而且整間店全部人都有傾有講，相處融洽。雖然他指飲食業不難找新工，但訪談完畢他也苦笑說：「佢（點心居）唔做，我都有啲唔開心。」

「如果搵到啱嘅地方，我哋都會考慮再開返」

客人、夥計都依依不捨，老闆又會否考慮重開點心居？「其實係好可惜，我哋有班老街坊，加埋好多學生，睇住佢哋由第一年去到畢業。遲啲如果搵到啱嘅地方，都係喺番呢區啦，我哋都會考慮再開返，始終都做咗咁多年。」老闆說。