天水圍的士逆線行公路 無視迎頭車淡定前行 拍片者：黐線㗎！
逆線行公路，只看片段都感覺「牙煙」。昨早（6日）網上流傳1段影片，只見1輛新界的士於天水圍洪天路逆線行駛，雖然一直打燈並靠左行駛，惟其他車輛在其旁邊快速駛過，讓網民都為之着急，「快快手掉頭，睇到我都急」，更喇諷他「勇敢」，「車速仲拍得住正線車」。
警方回覆《香港01》指留意到相關影片，新界北總區交通部交通調查組正跟進事件。
有網民昨早8時許在facebook群組「馬路的事討論區」上載片段，標題寫着「又嚟唔識形容系列」。片段由1位的士乘客拍出窗外，事發於天水圍洪天路，只見1輛新界的士在往天水圍及流浮山方向的公路上逆線行駛，即跟拍片者同樣向着元朗及屯門方向行駛。涉事新界的士一路打着左燈，並靠左行駛，其間有輕型貨車及巴士等在旁邊駛過，有私家車亦要切線避開，場面非常「牙煙」。
拍片者在影片中大喊「黐線㗎！黐線㗎！」，批評涉事者為職業司機都逆線行駛，片中拍片者所在的士的的士司機則估計，「可能（逆線的士司機）唔係揸開呢區」。影片隨即被瘋傳並引起網上熱議，有人看完片段即想起電影《天能》的情節，又揶揄該司機「有勇氣繼續行都唔掉返頭，支旗應該好大支」。
有網民指洪天路同一方向都有幾條線，當時亦不算太多車，質疑司機為何「唔拿拿聲轉軚掉頭？」，又直指「點樣唔熟路都好，如果最基本識得睇路牌、睇地線，根本就冇可能有逆線行車」。
警方回覆《香港01》指，留意到互聯網上流傳有關片段，新界北總區交通部交通調查組正跟進事件。
早前網上有車Cam影片瘋傳，1輛駕駛學院私家車被指在屯門公路的快線逆線行駛，途中更疑似剷上石壆，幸好片中沒有意外發生，網民看後則直斥涉事司機為「馬路核彈」。
警方其後表示，接獲市民報案後掃蕩，將懷疑涉案私家車截停，證實一名疑患有腦退化症81歲男子於案發時駕駛涉案私家車，而登記車主為一所本地駕駛學校。
的士拒載問題不時為人詬病，早前網上流傳1段車Cam影片，看到有的士司機在九龍灣麗晶花園附近疑似拒載輪椅乘客▼▼▼
同場加映：P牌陳嘉倩被轟「公路炸彈」 連登仔開Po列3點平反 引網民反駁