一直讀錯Merry Christmas?　曾鈺成教「震脷」讀r音

聖誕佳節，嘴邊左一句「Merry Christmas」，右一句「Happy New Year」，以為只是簡單英文，讀音便正確無誤？立法會前主席曾鈺成則在facebook拍片指，「Merry Christmas兩個字呢，唔容易讀得準㗎」，皆因r音需「震脷」，以及廣州話無r音，所以難以正確發音。

立法會前主席曾鈺成近日頻頻玩facebook，先在昨日（23日）發帖恭祝聖誕及新年快樂，今日（24日）又再上載短片，教大家「Merry Christmas」的正確讀音。曾鈺成表示，「因為兩個字中間都有r音，r音是廣州話，甚至普通話都冇㗎」。他又即場示範正確讀r音需要「震脷」，聽似非常難讀。

片段集中教讀「震脷」r音，曾鈺成又指r音「係要震脷嘅」，引述以前老師教導以急口令練習R的發音，更示範每個字以R為首的急口令：「Round and round the rugged rocks the ragged rascal ran」曾鈺成又解釋，除了唱歌或朗誦需要誇張r音外，平常說話則未必需要太誇。他續指，說慣廣州話的人，很容易將r音讀成ｗ或l音，需多加留意。

短片在網上引起熱議，數小時便有逾500個讚好，連財政司司長曾俊華也有讚好帖文。

有網民表示希望曾鈺成繼續分享英文心得，但亦有網民質疑英文的R音是否「震」得太誇張：

標準英文(Standard English)係唔用 Rolling R sound，你教人Scottish/ Spanish accent做咩？
唔係法國人先震得咁勁㗎咩？我聽英國人或美國人讀R都無震嘅，只係捲脷。同埋，北京普通話都有R音係咪？
你平時英文好好聽, 希望你分享下你以前係點樣練番黎