樓盤「䨇寓」你識唔識讀？　廣告人：濫用僻字係bad taste

樓盤名愈改愈刁鑽，「䨇寓」、「城中駅」、「瓏璽」，你懂讀多少個？
廣告人畢明向《香港01》形容，為樓盤命名應配合樓盤概念，濫用僻字可謂「bad taste」。
有的士司機指，新型樓盤名稱冷僻又相似，令人混淆，更易引起「兜路」誤會。

Facebook專頁「廣告狂人」早前上載照片，稱有位於屯門的新樓盤名為「䨇寓」，英文名為「2GETHER」，引起不少網民疑問「點讀？」事實上，「䨇」為「雙」的異體字，讀音、意思均一樣，香港興業銷售及市務總經理史慕蘭曾向媒體表示，「䨇」字完全對稱，寓意適合上車客組織二人家庭，但網民對此並不受落，更指猶如「交友apps啲名」。

翻查資料，近年本港樓盤名常用僻字，如位於何文田的「皓畋」（畋讀「田」）、位於西環的「眀德山」（注意，是眀，不是明，眀為明的異體字）、將軍澳「城中駅」（發展商將「駅」讀為「站」）、位於奧運站的「瓏璽」（讀「龍徙」）等等，頗為艱澀，而網民亦常反映「唔識讀」。

廣告人畢明向《香港01》指出，現時樓盤名稱愈改愈浮誇，「係某種扮勁嘅bad taste嚟」。她認為樓盤名用冷僻字，容易令消費者覺得陌生、拒人於千里，「佢連讀都讀唔到，就會唔認識你…...你同佢（客戶）溝通唔到，即係傳訊失敗」。

她憶述以往為樓盤命名，多會配合樓盤的設計、建築、概念，「好多呢啲考慮之下，我哋先會用一粒字」；惟現時情況似化妝「愈化愈濃」，「見人哋用個咁嘅字，要勁過佢，但已經失去咗purpose（目的），焦點同考慮唔同咗」。

汽車交通運輸業總工會的士司機分會主任杜燊棠向《香港01》表示，不少行家不懂讀城中駅的「駅」字，「我哋成日想問清楚嗰個字係讀『尺』定讀『站』，都會『尺』咪清楚囉」；而現時許多樓盤名十分相似，常令一眾行家感到混淆，「新樓盤咁多，真係記到頭都亂埋」，亦易令乘客誤會司機「兜路」。

新樓盤愈建愈多，名稱又相似，會否令消防員救援進度受阻？消防職工總會聶元風稱，控制組有資料庫，而消防員亦會定期前往新樓盤進行巡查、熟習環境，「好少話會有延誤」。