一世人必撞一次車、傷亡率逾9成？　揸電單車保安全注意呢幾樣...

香港地開電單車，俗稱「皮包鐵」，出晒名危險。新聞不時都見到牽涉電單車的意外，而且唔少都傷得幾犀利。究竟，開電單車係咪想像中咁危險？點樣可以避免意外發生？而萬一真係牽涉交通意外，你又應該點做？

相比開其他車，開電單車係咪想像中咁危險？（點圖看數據及分析）↓↓↓

下載「香港01」App ，即睇城中熱話：https://hk01.app.link/qIZYuEC5LO

但係，究竟開電單車呢件事本身，係咪真係咁危險？

以每百萬車輛行駛公里涉及意外率來計算，電單車開100萬公里的路程，就有6.61單交通意外。以呢個數據來計，你要開151,285.9公里才會遇到一次交通意外。呢個咩概念？假設A君住在荃灣，每日到中環IFC返工。根據Google地圖，一程要16.5公里，來回即33公里。當你星期一至五都開電單車來回的話，一年全年無休風雨不改咁開，就開咗8,580公里。如是者，根據呢個路程，開電單車17.6年就到151,285.9公里，A君就會遇到交通意外，而且呢場交通意外中，有92.9%機會係起碼會受傷。

相反，開私家車的話，要開699,300公里才會遇到交通意外。以同樣的荃灣到IFC來回計，要開81.5年才會遇到交通意外，而只有32.7%機會受傷。

小結：一位開電單車開得好密（好似上述荃灣來回IFC例子）的電單車手，假如30歲開始開，機會率來講，一生之中好可能會遭遇起碼一次交通意外。相反，同樣路線同年齡開私家車的話，機會率來講，一位普通私家車司機一世都唔會撞一次車。 

其實，開電單車點危險法?（點圖瀏覽）↓↓↓

但我都想開電單車，點先可以安全D？

參考返以上運輸署數據，越後生的電單車司機越容易遭遇交通意外，呢個應該同駕駛態度有關，因為年輕人身體機能理應較好。 無論開咩車都好，駕駛態度往往最重要：唔好超速駕駛，唔好超速駕駛，唔好超速駕駛！（重要事情講3次）

而就住電單車獨有面對的問題，例如容易被其他車司機不留神時忽略，而導致後撞前或過線撞到之類的意外，電單車司機應：

– 開車前檢查，並在駕駛時開著車頭車尾燈；

– 穿上容易被察覺的裝束，例如在衣物及頭盔上貼上螢光帶。

此外，開車前檢查車呔（尤其小心充氣過多，光頭胎，或者碎石或雜物嵌入胎紋，都會減低抓地力）、車底、車燈、死氣喉，並戴上頭盔等是常識吧！

雖然根據數據，以上述的路線，開電單車17.6年就會遇到交通意外，但呢個只係數據的平均值而已。呢個數據平均值，並無考慮到每一位司機本身的駕駛態度，會唔會超速等。只要你小心駕駛，即使開電單車一樣可以開得開心又安全！

萬一真係牽涉交通意外，你又應該點做？

意外後必做3件事：

a) 交通意外後必須報警；

b) 盡快到醫院求診；

c) 在可行情況下蒐集對方「疏忽」的證據。

如果你在交通意外受傷，而你又認為對方司機疏忽的話，你可能可以獲得賠償。各位車友，出入平安，需要時也要懂得爭取權益！

【本文獲「香港法律指南」授權轉載。香港法律指南的律師編採團隊專注於處理意外及災難事故索償及工傷索償案件，以及裁判法院至高等法院的刑事抗辯工作。】