大埔小店「老闆被老婆打」停工　復工老闆：都唔夠佢打

「老闆畀老婆打」都可以成為店舖關門理由？位於大埔廣福邨街市的九米香，早前就貼出「老闆被老婆打」告示，並在鐵閘外貼上白紙，供市民留言，並指「留言加簽名，老闆回來送牛肉麵一碗」。有留言：「早日康復」，也有批評他「好寸」。小店今日復工，《香港01》記者上門看看老闆李先生是否傷痕纍纍⋯⋯

老闆真的被打？

告示上擺明車馬稱「被老婆打」，那麼老闆真的被打？「未必架，睇你點睇啦，可能耍下花槍囉！」鬍鬚仔指，與妻子結婚近十年，一場夫婦總會有吵架時，「打情罵悄都好正常」，他與妻子也有打詠春，「間唔中黐吓手掂到下對方，好正常啫……好多時佢進步咗，都唔夠佢打」。但講到尾，鬍鬚仔又指，大家不須太深入研究「老闆係咪真係畀人打」，「問題係你睇得過唔過癮、開唔開心囉！」

原來，如此一場大龍鳯，只希望與食客有所互動 。「畀你鬧冇乜所謂，當係一種橋樑。」老闆「鬍鬚仔」李先生認為，食客平日無法宣洩，故標榜正面溝通。「就算我係無開檔，但我都無扔低啲生意，貼幾張紙，專登畀你插」。關舖數天，鬍鬚仔並非放假。店舖售賣牛肉麵和鹵水食物，他便特意到台灣取經，「我食咗十間，十間都唔得……就算我去到台灣，我都贏佢哋㗎！冇我咁好！」鬍鬚仔為人有點「寸」，但自問「寸」得起。

鬍鬚仔在鐵閘外貼上數張紙，分成「私（斯）文人留言區」、「遠道而來空肚而回留言區」、「囉囉嗦嗦留言區」、「嫌三縑四留言區」及「問候老闆留言區」等。留言並簽名者，可獲牛肉麵一碗。店舖今日（7月11日）復業，可有顧客到場換麵？鬍鬚仔笑了笑指，此事已反映到人性的弱點，「要根據佢留言嘅內容，佢夠唔夠膽面對佢嘅內容？係夠膽講粗口又敢嚟認領嘅，我送兩碗比你都唔係問題！」

聲稱學過催眠的鬍鬚仔稱，每做一件事，均希望令人記住。「老闆畀老婆打」告示中一隻LINE的哭泣公仔，原來亦是他「處心積慮」加入的，「加咗個公仔，啲人易記得，又真係以為我比人打」。店舖有趣的，不只鐵閘外的留言區，一張檯、一碗牛肉麵的名稱也充滿玩味。牛肉麵名叫「好難吃牛肉麵」、檯上印上IQ題、標語寫明「寧做少一單生意，莫做衰一份食物」、列明「嫌三嫌四、未買嫌貴、囉囉嗦嗦」恕不招待。一切舖排也希望捉緊食客眼球，亦是在鬍鬚仔計算之內。