【豬年2019】網民列過年最討厭的事：派利市、送禮、拜年都好麻煩

過年應該是開開心心的傳統節日，但隨住年紀漸大心態轉變，不少人會變得討厭過年。有網民在「親子王國 Baby Kingdom」討論區列出過年3大麻煩範疇，稱派利市、送禮及拜年聚會都很麻煩，不但要破財派利市給「三唔識七」的人，還要被人嫌金額少，而過年送禮兜兜轉轉，結果囤積大量新年禮品；而與親朋戚友聚會時，則被人左問右問，還要等候數小時才有飯吃。帖文引來許多網民表示有共鳴，集體圍爐取暖訴苦，甚至有人提出應取消農曆新年這個節日。

下載「香港01」App ，即睇城中熱話：https://hk01.app.link/qIZYuEC5LO

派利市

有網民在「親子王國 Baby Kingdom」討論區以「過農曆新年你最討厭的行為／事情」為題發文，拋磚引玉指「樓下保安員平時只見得一至兩個，初一、初二，成村人5至8人企定定咁等收利市」，隨即引起許多網民認同，指「每年都係咁，所以我見人多就後門鬆人」；另一名「受害者」指「停車場出口平日1名保安員，過年有4、5個，停車場入口有7、8個衝出嚟，有啲仲係未見過，呢個遊戲會玩足幾日，收過都再問你要，根本認唔到」。

除了「與保安員捉迷藏」外，有港媽亦大呻要向平時沒見面的小朋友派利市，她表示自己誕下2名兒子後離婚，孩子跟隨前夫生活；而一位女性朋友則與外國人結婚，同樣有2名小朋友，雙方平日不會見面，但每逢新年對方就「約出來食嘢」，目的想讓孩子「𢭃利市」，當港媽向對方孩子派利巿後，欲代自己2名兒子「𢭃利市」，但對方辯稱「嫁鬼佬唔興派」，令到港媽大感無奈。此外，亦有網民訴苦指派利市時，小朋友竟即場拆開，「仲話好細封」，令人十分尷尬。

公司則是新年期間已婚者恐懼的場所，有已婚網民埋怨「第二個部門唔識嘅同事過嚟拎利市」及「最討厭其他部門嘅人帶一班唔識嘅人嚟掃場」，有女網民代丈夫答「最憎啲同事帶仔女返公司周圍𢭃利市」。有人則稱，有同事每年年初四帶同女兒返公司，「美其名係探下啲叔叔姨姨，實際係利市大豐收」，由於該公司多達近200人，其女兒由3歲𢭃到13歲，「好多人都暗地裡恥笑佢仲會帶個女𢭃多幾多年？18歲？定大學畢業？」

送禮

除了派利市外，有網民指「最討厭係為送禮而送禮，硬係要互送」，有人即回覆「搞到成屋金莎，邊食到咁多」、「（親朋戚友）將啲唔想食嘅朱古力禮盒送晒畀我個女，你屋企唔肯食，就咪逼我囡要啦！仲要臨走前一手逼我個女要，煩死！」

送禮給老人家亦十分麻煩，有網民指長輩要求「送禮要有新意，又要環保，健康有營養」，直言「被玩謝」，即使成功送出，但老人家需要極長時間才能吃完，有人直言其祖母收到的新年賀禮「食到復活節」，囤積家中令人煩惱。

有見及此，有網民分享化解招數，留言指「有啲親戚屋企真係得返老人家，送糖同餅，佢地點可能食得咁多，所以畀超市劵，買米都得，又實際又唔浪費」；亦有人在過年前跟親友坦白說明不要互送禮品，結果家中「少咗好多盒」。

拜年應酬

新年長假期留港，許多人都少不免要出席親友的拜年聚會，席間要應酬整年沒見的親友，許多人都表示厭惡，尤其是長輩們總愛問長問短，還千年不變地夾雜令人尷尬的問題，當中例子包括︰

冇樓問幾時買樓？
未婚嘅問幾時結婚？
結咗婚嘅問幾時生仔？
有BB問係仔定女？（如果係BB女再問幾時生仔？) 喺私家定政府醫院生？使咗幾多錢？
生咗仔問幾時再生多個？
搵幾錢一個月？
老公／老婆做咩工作？配偶搵幾多錢？
租樓定買樓？
點解肥咗／瘦咗？

有網民表示，每年都要向一名長輩拜年，對方「鍾意有意無意間踩吓人嚟抬高自己…真係以為自己好威咁，不停自high」，該網民暗忖不想對方難堪，以及尊重他是長輩，因此不想開聲反駁，坦言情況是「得啖笑」。

另外，聚會中有親朋戚友遲到是指定動作，無論是年初一飲茶還是等對方前來拜年，漫長的等似是必然，有女網民表示「記得第一年男家過年，朝早11點已經拜完祖先，食埋午飯仲洗埋碗，跟住呆坐發夢到下午1時半先有親戚嚟拜年，又悶又眼瞓」，亦有網民指「團拜啲人成晚上8點先出現，即係由6點坐到8點呆等」。

此外，過年其中一項熱門活動就是打麻將，但未必人人想打，有網民坦言「打牌又嘈又未必贏」、「年年都打牌，畀人當水魚咁劏」，即使「無贏無輸打和」，亦認為「浪費時間囉」。

帖文讓不少「過年厭惡者」發表意見，有人表明「基本上好唔鍾意過年…麻煩搞一輪嘢」，甚至希望要取消農曆新年節日。但亦有人提出相反意見，稱「好鐘意過年，同兄弟姊妹聚埋一齊，有講有笑」，看來家家有本難唸的經，各人喜好大不同，新年還是一團和氣為上。

（親子王國 Baby Kingdom）