【在職媽媽的遺憾】港媽忙賺錢　心痛仔女只黐工人　錯過見證成長

香港雙職父母極多，只能聘請外傭照顧子女。有在職媽媽抱怨產子後身體大不如前，但為供樓只能努力工作，加上加班後難以抽時間陪伴子女，錯過了孩子成長的重要時刻，結果孩子只愛黐工人，甚感遺憾。不少港媽感同身受，指溝通重質不重量，建議改由工人做家務，父母多陪孩子才能維繫感情。

下載「香港01」App ，即睇城中熱話：https://hk01.app.link/qIZYuEC5LO

有港媽網民日前於Baby Kingdom討論區，以「錯過左小朋友嘅重要時刻會唔會好遺憾」發帖，她自稱是在職媽媽，為供樓與丈夫要「公一份婆一份」，每天上班連加班，回家時已是晚上8、9點，兩名兒子平日由工人照顧，日常鮮有時間相處，結果「返到屋企兩個仔淨係鍾意黐住工人唔要我」，直指心裏不舒服。

她亦表示「生完仔好似極速衰老， 而且頭髮又甩得愈來愈多，樣又殘」，下班後累得只想休息卻睡不着；明明只得30多歲看起來卻像40歲；從前不怕冷，到現在很怕冷。她認為「作為一個媽媽，最想見到嘅就係小朋友幸福成長，見證佢每一日嘅轉變」，嘆現時就算努力賺錢供樓為頭家也好，卻和兒子漸行漸遠，非常心痛。

樓主明白做全職媽媽十分不容易，但渴望能和同孩子經歷每一刻，惟實際卻未能做到。她曾想向丈夫傾訴，惟怕影響其心情，也只好悶在心中。

帖文一出即引起大批有同樣困擾的媽媽共鳴，紛紛留言支持。有網民認為全職媽媽雖辛苦但起碼可以「攬住個仔」，在職媽媽「就辛苦一大餐，間海景靚屋係畀工人住，個仔係黐工人，個心真係好傷」。

有網民認為往好的方面去想，「小朋友鍾意工人都要工人對佢哋好先得，調轉頭諗，至少對小朋友可以放心交比姐姐照顧」，又建議在職父母要把握放假時間多陪小朋友，「小朋友一定感受到你的愛，漸漸長大亦會明白你的付出」。

有網民則表示，和小朋友建立關係，需要付出時間心機，「講得白啲，下欄嘢畀工人做，講故事陪沖涼落街玩，幾攰都要自己做」。

全職媽媽也安慰樓主其實你睇我好、我睇你好，「每日見證小朋友成長係開心，但係都好想返工搵多少少錢，買嘢都唔使就住就住」，指兩邊都要有所取捨，無非都是為頭家，要同心協力加油。

（Baby Kingdom討論區）