新搬入村屋「好多生物死喺附近」　連貓咪都跪低　巴打上高登求解

不少人搬到村屋居住，都希望能親親大自然，呼吸新鮮空氣，不過有網民近日在高登討論區發帖，指搬進元朗一間村屋後，發現「好多生物死喺我附近」，包括7隻蜜蜂、10多隻蚊蟲、青蛙、多隻老鼠等，最奇怪的是有隻貓咪在其門口前跪低，當抱走牠到遠處時就瞬間彈起來跑走，令他百思不得其解，同時引起網民熱議。不少巴絲打「偵探」上身分析箇中原因，有人認為可能鄰居噴了很強的滅蟲滅鼠藥品，亦有人指貓咪叼來死物歡迎他新搬入村，另有網民笑說，「樓主毒氣強勁，方圓十里蛇蟲鼠蟻自動消失」。

下載「香港01」App ，即睇城中熱話：https://hk01.app.link/l7U1Y7t5LO

有高登巴打前日（11日）在討論區發帖，指最近新搬入元朗一間村屋，兩層都只有他一人居住，閒時女朋友會前來過夜，而上網搜查過該幢村屋「無死過人」。不過入住第一晚就有奇怪的事發生，一搬進來已死了7隻蜜蜂及10多隻蚊，但由於村屋有蟲亦屬正常，樓主未有為意。第二晚卻在家門口發現數條蜈蚣，過幾天又有青蛙死在廁所內，以及驚見多條老鼠死屍，「keep住成個星期都有啲生物喺到死」。

大前日（10日）樓主看到一隻貓咪在家門前「跪低咗」，走近他時看似軟弱無力地倒下， 他隨即抱起貓咪跑到遠處，「跑跑下佢就彈起身跑走了 」，但回到家中又看到兩隻死了的老鼠，非常奇怪，遂發帖詢問巴打意見。他其後又補充，漁護署檢驗家門前兩隻雀鳥屍體，沒發現任何病因，「叫我放心無禽流感」，但這令樓主更加擔心。

網民意見：

網民看完帖文都驚呼「有古怪」，有人認為是樓主鄰居在家中周圍噴灑殺蟲水及下老鼠藥，「（動物）聞到之後逃亡，你冇噴所以逃去你個邊，然後頂唔住死咗」，不過即便如此，也提醒樓主要留意身體狀況，「長期吸入都唔係好事」，亦有人指可能是天氣轉冷，小動物受不住，「凍死咗啫，冇嘢嘅」。

另有網民猜想是「貓之報恩」，「（老鼠死屍）係隻貓送畀你嘅入伙禮物」、「想入住你屋企先帶咁多禮物畀你」；亦有人指可能被仇家報復，「玩你或者玩你業主，想呢幢樓租唔出去」。最後網民亦建議，如果樓主感到擔心，可以裝上閉路電視看清楚狀況，亦可找來風水師傅指點迷津。