廚師腸疑停產引爆恐慌　網上玩嘢炒價高見400蚊包

由煮「頹麵」、圍爐火鍋至聖誕大食會，廚師腸總是必備食品，不過近日有報道指其美國生產商Zacky Farms已遞交破產申請保護令，早前更已關閉生產廠房，意味廚師腸隨時絕跡市面。消息傳出後不少港人極度崩潰，猶如「世界末日」，甚至有市民即到超市或凍肉舖掃貨，網上價更被炒起，出現玩嘢炒風。

下載「香港01」App ，即睇城中熱話：https://hk01.app.link/l7U1Y7t5LO

繼早前有賣家在facebook二手買賣群組發文，以每包200元出售廚師腸後，有網民聲稱200元都有人要，索性提價至300元加推，誰知愈升愈有，昨晚廚師腸網上炒價再度上升。有網民在fb群組「將軍澳」發帖，指以每包400元出售，「寶琳站交收，唔包膠袋，不喜勿插，可煎炸炆燉烤燒有不同食法，居家旅行，必備首選！」

賣家的出價超級極度離地，擺明玩嘢，不過也有網民認真地以為樓主想藉此取利，鬧爆「癡線，我屋企有10幾包，我400蚊放返畀你」、「人性真醜惡」，但更多谷友相信樓主純粹搞笑，又稱「曲線要講明」，亦有網民笑問可否「散賣一條留念」。

另有人指「唔好食住，留返十年八年好值錢」、「絕版美雞腸必升價萬倍」、「我有6包，樓主要唔要$200收購左先，轉手賺一倍」，樓主其後現身稱「玩大咗」，亦笑指遲點就會拿去拍賣。

不過記者在Yahoo拍賣網，亦見到有賣家以60元出售一包廚師腸，但暫時未有人問津。而其實不少理性市民都在網上分店市面店舖仍然有售的資訊，而且售價正常，留言呼籲大家還是冷靜一點。