女途人暈倒診所外　醫生疑見暈不救捱鬧　目擊者斥：仲叫佢行開

惻隱之心人皆有之，更何況是救人治病的醫生呢？網上近日瘋傳一名女途人在元朗一間診所外暈倒，其同行人士報警求助，其間有熱心市民打算叫診所醫生出來提供協助，但該名醫生不但拒絕，更「行出嚟叫人唔好坐喺佢鋪頭門口旁邊」，帖文引來多名網民鬧爆，慨嘆「『醫者父母心』呢句，唔係個個啱用㗎」。

下載「香港01」App ，即睇城中熱話：https://hk01.app.link/qIZYuEC5LO

有網民昨晚在facebook群組「元朗吹水區」發文稱，他經過元朗裕景坊「冬菇亭」附近一診所時，在門外見到一名女士懷疑不適，突然暈倒，女士的同行友人馬上報警，熱心市民見狀亦嘗試提供協助，並問道「Call白車穩陣喎，Call唔Call呀？以前有冇試過咁樣呀」？

其間樓主曾主動問診所姑娘，可否叫醫生出來協助，但醫生卻一口拒絕，「叫嗰位女士自行call白車不特止…行出嚟叫人唔好坐喺佢鋪頭門口旁邊」，令樓主不禁批評「邊有咁嘅醫生」。從樓主上載的照片及短片所見，當時身穿黑白上衣的中年女士，已初步回復清醒及有反應，亦可以揮手表示不用入院。

帖文引起多位網民批評，坦言「真係要罷睇佢，太過份」，又認為他「有位都唔識上」，指醫他出來救人之餘，更可以贏得市民掌聲，但偏偏放棄機會。亦有網民分享類似經驗，「試過喺大埔同一情況，前面有個女仔暈低，好彩我喺後邊頂住佢，唔係頭落地，咁啱隔離嗰診所醫生都跑出嚟，不過個女仔幾分鐘後醒返都急住返工，驚遲到」。

正當網民鬧爆涉事醫生沒有醫德時，有一名女網民卻留言稱，事發時該名醫生正為其上吐下瀉及發燒的女兒看症，醫生「聽到有人暈咗…就叫護士出去叫佢哋call白車先」，不足一分鐘迅速看完症後，醫生立即出去「睇嗰位女士，並詢問而家有無好啲」，女事主的同行友人回答沒有大礙，「醫生就叫女士唔好坐地下，可坐上石壆位休息」，女網民更稱自己取藥時見到有人在拍片，但沒有想過事件發展成見暈不救的版本，希望藉住留言還醫生一個公道。

《香港01》今日傍晚曾致電涉事診所了解，但職員稱醫生晚上7時半才會返到診所，記者其後再次致電診所，但無人接聽。

（fb群組「元朗吹水區」）