創作要自我 《棟篤特工》編劇柏原太賀及留晴：被子華神ban都抵
【文章原刊於01撐場，歡迎下載香港01 app，與星級作者一同討論喜愛話題。】
撰文：清君
下載「香港01」App ，即睇城中熱話：https://hk01.app.link/qIZYuEC5LO
訪問成癮，是次特意邀到兩位重量級（好大頂高帽）人馬做訪問，他們就是《棟篤特工》編劇組的兩位人物：柏原太賀及留晴，兩位於戲末以真名示人，分別是吳禮賢同劉彥如。
兩人相知相識
那麼，兩人筆名是如何得出來呢（嘿，我被人問得多，總算到我問人了）？一向鬼馬的柏原立即搶答：「我個筆名其實係非常商業，一啲特別或者個人意思都冇喺度」，他指當時第一次於高登上面寫故仔，已經想好一套策略，第一步是要人在搜尋引擎找到自己。「如果你google陳李張黃何……唔使諗㗎啦，因為大家人都係呢個姓。」他逐步推敲如果香港人要找到你，首先要是漢字，然後漢字日本亦有共通字，但如果是日本也不能用流行常見的姓名。「咁我搵到姓柏原嘅得兩個人，一個叫柏原崇，另一個叫柏原芳惠，你搵第三個就已經會係柏原太賀。」可以話這個名，真的改得很求其。
至於留晴，亦都是懶得求其。「我淨係想用自己中文名頭同尾夾埋，原本應該叫劉如，但我用咗愚蠢個愚。」那為什麼變了留晴呢？原來是因為出第一本書《第26號男友》時，編輯說愚字不吉利，就隨便改成了留晴。「原本想中性啲等人估唔到男定女嘅。」陰差陽錯，錯有錯着，現在留晴這名字頗入屋，幾好啊。
那麼，這兩個人到底如何相遇呢？一個鬼馬冇厘正經，一個比較沉默內歛，好似大纜都扯唔埋。
「我哋係唱卡拉OK識嘅。」哇！好懷舊的感覺──但也似乎切合他們年紀會做的事。「嗰時有位編輯同埋胡世君約嘅……」留晴話口未完，柏原就搶白：「其實當時當係一個文化人聚會，應該講係搵唔到食又唔出名嘅文化人嘅聚會，咁就包括我哋兩個，仲有新晉編輯Kiki，出咗旅遊書嘅胡世君一齊。」
留晴禁不住笑：「哈哈哈，（成件事）都好蘇軾㗎真係。」
這兩個人寫小說並不是第一次合作，如我所言，他們是《棟篤特工》的編劇，原來這部戲早於兩、三年前已經開始寫作。「合作原因係我知道佢有寫過舞台劇。」留晴補充一句：「仲有微電影啊嗰啲……」
其實留晴這個人非常神秘，在做訪問之前，雖然我不喜歡做資料搜集──必須強調是其他訪問的搜集，否則，我都會盡能力去了解受訪者。我在做資料搜集時，幾乎完全查不出有這號人物！柏原太賀亦深表同感：「我識佢之前係完全冇聽過呢個人，但我識佢之後呢，佢話我聽佢已經寫過舞台劇，微電影。呢個人神秘在佢寫嘢但嗰陣時唔出名，你問佢有咩做呢？佢又話凈係寫嘢喎。」留晴給人的神秘印象，似乎已經是不可抹去的特色。為什麼會這樣呢？留晴解釋道，因為她以前有很多筆名，都是實驗性質的，而且多數用來做商業微電影，作品向內而不是向外，自然難搜尋到相關資訊。
編劇難在協調各種利害 與寫作截然不同
當問及兩個關於攜手寫劇本的難題時，兩人便正經起來。留晴先開腔：「其實係有啲唔知點入手。」這個入手，不是指寫作上難以入手，而係編劇角色，原來是要協調其他人想法：「唔係淨係度橋，仲要sell橋同理解佢哋要求啲咩」，留晴說，他們經驗尚淺，於是難捉套路。柏原補充：「最大個問題係諗唔到，最大困難其實係我哋飲飲食食完咗之後，死啦，要講啲乜呢？」他指一般人認為做編輯一定會有個完整故事，想表達某些東西。但是，如果在一個非常商業化的情況下，編劇須兼顧的就不止如何講故事，而係探索到底市場如何運作，人物之間如何協調。「我地預期係寫嘢、度故仔啫，完全估唔到除此之外咁多考慮同限制。」
不過多限制還多限制，全因為劇組都想做到最好，但如何叫「最好」？每個人定義都不一樣。「大家搵個平衡出嚟，就叫最好。」
從事寫作經年，劇本係講故仔，小說又係講故仔，那到底這兩者間有什麼不同之處？
寫劇本，是要令導演明白怎樣拍出來，最大分別應該是對白。對白要精簡，唔能夠長氣，同小說不一樣，小說要用文字慢慢一步一步建構世界觀，劇本則是簡單明瞭地令導演知道他要怎樣拍這個世界觀出來。
柏原基於上述補充：「我哋編劇係講件事嘅流向，每一件事點present出嚟係導演話，而點present都會影響件事嘅成敗。我哋畀把刀出嚟，刀法就由導演演繹啦。」
兩人合作不止於《棟篤特工》，還擴展到小說。問到他們有什麼契機，柏原黯然神傷說：「呢個係一個悲劇嚟。」咦，何解是一個悲劇呢？原來，這個故事原本是寫作電視劇的！他們已經將分場、大綱整理好，不過好景不常，那一家電視台竟然倒閉了。「你冇可能諗到電視台會執㗎嘛。」兩個人其實是在寫電影中間有些空檔，於是就催生了《我願以你再三為我合法妻子》。
那麼，原本是一大疊劇本，跟小說成品有什麼不同呢？「個成品基本設定都係一樣嘅，因為我哋做小說，所以想精簡啲，將五十幾六十集嘅內容刪減好多枝節，集中講主線。」
有讀過小說的讀者可能知道，故事背景設定在九十年代。通常時、地、人這樣設定，總有些特別意義，沒錯，「有人覺得回歸前後梗係有啲嘢嘅」，不少電影、戲劇都玩這一套，而這故事特別之處在於是真人真事改編，你萬萬想不到有人結三次婚，三次都是同一個老婆吧？而設定在九十年代而非真事的八十年代，是因為資料搜集及其他方面都會難度大增，所以就捨難取易了。
編劇生活好自由？ 視乎你點睇啦！
然而，兩個人合寫小說，是否會有一些特別地方？
這又要重回電影合作上面，因為第一次由電影合作開始，所以寫作都是以大綱、分場、分場內細節、每個角色的言行舉止，怎樣牽動去下一場等等，這些訓練、思維帶到小說上，在動筆以前已經知道人物角色要做什麼，什麼時候埋下伏筆。而兩個人的分工，基本都是男寫男，女寫女。而大體由柏原寫下，再由留晴擴充句子。兩人合作非常無間，當中更從未吵架！
問及兩人編劇創作路，柏原又再打趣：「喺香港社會生活好悲情，如果你有一份正職，係好難可以搵到一份兼職嘅。咁居然有一份兼職冇特定返工時間，咁又何樂而不為呢？」原來做編劇的生活這麼自由？想深入一點，其實也不容易，做冇定時，代表休息也不定時，不如又聽聽留晴怎講。
「我以前返full time嘅，都係喺啲大公司大機構度做嘢，後來覺得自己唔鍾意返工，哈哈，就quit咗份工去讀翻譯，咁但係又冇理由唔做嘢㗎！咁就試下接啲文字job啦。」她那段時候都是寫計劃書、搞活動等等，然後建立起自己的人脈網，慢慢又寫廣告，又寫微電影劇本，「嗰時唔識都話識㗎！」頂着頭皮硬上，練就一身好工夫。就這樣，留晴就以「獨立電影」為工作，「嗰時識咗班APA學生，好彩阿sir有少少support，就拍下啲嘢」，她形容整個過程很開心，而且因為崗位並不固定，今天你寫劇本，明日可能要化妝，然後又可能要去製作道具甚至搵場地，如此磨練，讓人唔得都變得。
講及編劇工作，兩人似乎都覺得作為正職會唔得掂，主要原因在於永遠難以預測完工時間，而且隨時間攤分，那筆錢到底夠不夠過活呢？「有啲比較『囂屎』嘅編劇，第七稿之後會同你逐個收錢。」有性格的如此，沒性格的呢？「一定要收咗訂先！」兩人異口同聲呼籲新入行者，亦都同聲同氣地讚子華老闆：「我哋收咗訂，準時地喺某個時間收咗錢，上畫之前就已經收晒錢，好好彩。」看來，有時候不是工作問題，而是跟哪個老闆的問題。
由文字到影像 單打獨鬥變團隊合作
那麼，兩位原先從事文字創作的人，看到自己的文字轉化成影像，到底是什麼感覺呢？
對柏原太賀來講，他之前第二本小說已經改編成廣播劇。但由廣播劇一躍搬上大銀幕，對他來說是一個「幾大嘅進化」。他從未想像原來一句對白，其實可以「咁樣講、咁樣講」，帶來截然不同的效果。而且，就算寫小說有人同自己合寫都好，都是一件單打獨鬥的事。去到做電影，就是一件高度分工的合作事宜，每個人負責一部分，沒有了哪一部分都不行。
留晴在此亦補充，「其實我哋做創作係好自我㗎，但當你做一個編劇，必須要擺低呢一個自我。」做創作人的時候，總會覺得自己所想的所寫的最好，「你敢ban我？」但當換轉角色，做編劇時，就要受得起ban。「又要睇下ban你嗰個係邊個嘅，今次ban我哋嗰個係黃子華，咁都ban得抵。」一入行即可跟子華神學習，夫復何求呢？
最後，問及兩位有沒有什麼可以向新入行或想入行的編劇講，柏原立即很謙厚的說：「其實我哋都好新㗎啫，出得名掛得名嘅得一套……」不過，他還是有個實際建議，那就是，多看戲。「無論係國內也好，外國也好，都要睇！入戲院睇！如果係舊戲嘅，搵返碟出嚟睇！或者用收費付款方法去睇！」何解呢？因為與你開會度橋的那一群人，他們睇過的戲遠遠多於你，如果你沒有睇過那齣戲，不知道哪個場口有什麼對白、什麼場面，根本無法溝通，他們要的是那種質感、那種厚度。
他又舉例：「例如活地亞倫同葉念琛都係拍愛情片嘅，大家對浪漫嘅睇法都唔同，到底背景加咩歌落去呢？如果你冇睇過，根本講唔到。」除了睇戲要夠多，還要非常勤力。留晴說到現在市場競爭太大，雖然編劇仍然很缺，不過在大陸來的編劇非常搶手，因為他們那種幹活、刻苦耐勞不是香港人想像到，像是一萬字的功課，他們可以一晚間就寫完！
結語
「香港人比較輸蝕嘅係，我哋要去到某個收入水平先維持到生活，如果冇咁嘅收入，其實好難去支持一樣自己有興趣嘅嘢。」仍然是兼職編劇的柏原太賀一輪感歎，但他指自己已經有新一輪計劃。「我小說畀咗五年時間自己，完成咗由2013至2018年呢個階段，我又會再去做下其他嘢。」至於留晴，仍然會將重心放去寫故仔，但未必是出書，而是放到網上平台。
香港創作殊不容易，有幸認識到這兩位朋友真是一種緣分。希望他們兩個的經歷能帶給各位一些啟發，至少，我亦從中得到一些啟示。讀到這裏的朋友，多謝你，你很用心去閱讀文字，不介意的話，點個讚或分享開去吧！謝謝！
【編按：文章題目為編輯所擬，原題為「走訪兩位《棟篤特工》編劇 講同一個人結婚離婚三次的故事」】
（文章純屬作者意見，不代表香港01立場。）