半世紀前海軍秘密香港行山路線　保育先鋒香樂思帶你尋幽探秘

今日想同大家介紹嘅係《野外香港歲時記》原作者香樂思推薦嘅隱秘行山路徑。呢本書其實我係喺一次機緣巧合之下喺中華書局度見到嘅，始終關於行山呀郊外呀嘅書唔係好多，所以當時我見到呢本書嘅時候即刻好似如獲至寶咁，眼睛發亮，好期待本書講咩。
撰文：山系人

【文章原刊於01撐場，歡迎下載香港01 app，與星級作者一同討論喜愛話題。】

下載「香港01」App ，即睇城中熱話：https://hk01.app.link/qIZYuEC5LO

第四章講到香氏憑藉佢係海軍將領嘅女婿，獲得一份海軍之間流傳嘅行山路線圖，而路線圖所記載嘅行山路徑有我哋熟悉嘅大帽山鳳凰山，亦有我哋唔熟悉嘅行山路徑，就係由九龍灣和東涌出發，行未有發展成行山路徑嘅偏僻山野。班海軍熱血得很，唔中意做啲平凡事，即使行大帽山同鳳凰山，佢哋都會選擇行一啲較為隱秘刺激嘅路徑抵達終點。正因為佢哋熱愛刺激隱秘，專揀未開發嘅行山路徑，所以香氏所推薦嘅行山路徑多數都需要行差不多十個鐘頭，真係對山野少啲熱誠，個人少啲體力都唔得呀！

首先就講下最不為人知嘅九龍灣路徑先啦！

路徑如下：由九龍灣出發，穿過茶寮坳落山，沿白沙灣西海岸走到去當時仲係風光如畫嘅西貢墟。然後穿越水稻田入樹林，去到虎地頭村。之後走到去坑槽水河谷，去到十字路口，然後行右邊嘅山脊方向上山。呢條路山勢陡峭，一個唔小心就非死即傷，非常危險。行完條陡峭嘅路，就上馬鞍山東峰，然後一路行上馬鞍山主峰。

行去主峰嘅途中會經過大亞灣，相傳大亞灣以前叫Bias Bay，即係偏邪之地，只因Bias Bay以前係海盜集中地，佢哋經常掠奪商船。後來海盜因為掠奪Irene號商船，遭到皇家海軍拘捕，判以死刑，自此Bias Bay嘅海盜就滅咗跡啦！

經過Bias Bay上到主峰之後，往東落500尺，行過高高低低嘅吊手岩，再沿山脊往西落大水坑村前溪口，行三里半到沙田圍，再行兩里到沙田坳，然後就會到添馬艦。全程9小時15分鐘。

哇！就咁睇睇我識嘅地名，九龍灣即係九龍區啦，西貢墟即係新界最東面啦，然後去返馬鞍山沙田，即係上返新界東上少少，到咗沙田之後居然會去到金鐘政府總部嗰邊，認真amazing！點解喺新東行行下會過咗個維港，去咗港島嘅呢？相信香樂思喺當中冇記載到佢當時應該搭咗啲小舢板過海，先會去到金鐘。

總括嚟講九龍灣呢條隱秘行山徑係幾有挑戰性同神秘感嘅，不過我相信最後去到金鐘個度依家做唔到啦！我就會喺呢緊放假，約班朋友行九龍灣呢條隱世行山路線，不過就會去到沙田就算。始終依家我哋應該冇咩可能可以唔經陸路交通直接到達金鐘。大家有興趣嘅，都可以約埋一班山系人挑戰下呢條隱世路線！

書入面其實仲提到好多其他行山路徑，包括：由長洲出發去鳳凰山；由沙田出發去到慈雲山以北嘅山頂；由荃灣出發去大帽山山頂等等。不過由於我擔心有版權問題，唔可以再繼續詳述其餘行山路徑，大家有興趣想知道其他行山秘境，可以去書局買《野外香港歲時記》。

大家唔好抱住睇小說嘅心態去睇呢本書，要抱住好似睇緊人哋本日記或者一本教科書嘅心態去睇。因為呢本書盡是平鋪直述嘅文字，絕對冇小說咁峰迴路轉高低跌宕。不過，即使未如小說般有轉折點咁刺激，單單係睇香氏述及不為人知嘅行山秘境，靠想象都已經感受到香氏嗰種喜愛山間嘅感覺，未經發掘嘅山間秘境給人清新、神秘、危險之感。所以，呢本書係絕對有睇嘅價值！各位山系人，我絕對推薦你哋去睇呢本書！

講完本書，我覺得有需要講下原作者同譯註者。畀大家認識一下佢哋兩位，全靠兩位我哋先可以有機會知道呢幾條喺海軍之間流傳嘅秘密行山路線。

先講下原作者，佢叫香樂思。上網翻查過關於佢嘅背景，原來係一個保育先鋒，倡議將一啲有生態價值嘅山野列為郊野公園保育，設立宿舍予動植物研究專家長居，以方便研究山野之間嘅稀有品種。香樂思愛大自然嘅程度可謂係去到瘋狂嘅程度，我呢個Yama Girl山系女孩都望塵莫及呀！

話說原來香樂思經歷過日軍統治嘅三年零八個月，而香樂思當時就被囚禁於赤柱集中營。而赤柱集中營嘅自然環境深深吸引住山野男子香樂思。即使佢被日軍囚禁住，仍然不忘研究赤柱自然環境動植物品種，以青竹蛇為寵物，睇螳螂卵泡成長為樂。

正正因為香樂思係一個咁熱愛山野嘅男子，令我對佢本書更加有興趣。

而有呢本咁珍貴嘅書出現，亦要感謝譯註者彭玉文，倘若冇彭先生嘅翻譯同備註，恐怕香樂思嘅海軍秘密行山徑就要失傳。點解？因為香樂思寫呢本書嘅時候香港仲係好落後，未有太多發展，香樂思所記載嘅地名分分鐘都會同我哋依家嘅地名唔同；有啲行山路徑甚至乎已經消失於世上，所以全靠彭先生實地考察同搵好多參考書籍，先能夠令我今日可以一睹香樂思所推介嘅行山秘境，同大家分享。

【編按：文章題目為編輯所擬，原題為「讀：《野外香港歲時記》──發掘屬於海軍的秘密行山路徑」】

（文章純屬作者意見，不代表香港01立場。）