【山竹過後】港媽訂淘寶貨　內地集運倉水浸　未提賠償恐渣都無

香港的「淘寶達人」經常使用內地集運公司運貨，但颱風「山竹」重創內地運輸及物流行業，令香港買家隨時無貨收！有網民昨日在「親子王國」討論區指颱風前訂購了數千元傢俬，選擇透過「增益速遞」運貨，懷疑貨物或單據被水浸濕，被速遞公司告知不但沒有購買保險，而且要「有心理準備會全部貨冇晒」，且沒有提及賠償，樓主大吐苦水求教網民該如何是好。
數名增益及其他內地集運公司的「苦主」網民亦同聲一哭，直呼「都係冇晒（貨）」、「唔知（貨物）下落」，但亦有增益受害人留言指，與該公司商討後，獲得貨物總值的三分之二賠償，下次光顧時將提供運費優惠。

下載「香港01」App ，即睇城中熱話：https://hk01.app.link/l7U1Y7t5LO

超強颱風「山竹」在中港澳造成嚴重破壞，部分低窪地區曾嚴重水浸，而內地有集運公司的貨倉位於低窪位置，故貨物很大機被浸濕，山竹過後市面百廢待興，內地運輸及物流服務逐步回復正常，正點算貨物浸濕情況及損失數字。

有網民昨午在「親子王國」討論區發文，指「山竹來之前，訂咗啲貨，全部畀水浸晒，集運（公司）叫我有心理準備會全部貨冇晒，嗰度成幾千蚊」，樓主形容「好心痛！有啲仲係我朋友，集運（公司）冇講點賠償，我都唔知到點同朋友講，朋友就畀晒錢我，我就冇貨畀人，點算啊？」樓主進一步解釋，指透過「增益速遞」運送木櫃及不銹鋼鐵架，增益稱沒有購買保險，未知貨物還是單據被水浸濕，所以無法運貨，隨後又指找到其中一件貨物。

有遇到同樣情況的受害人亦大吐苦水，「佢（增益）話水浸晒…損失40至50萬元…冇買保險」、「自己預冇晒，唔想抱太大希望。我啲嘢其實係矽膠，玻璃同埋不鏽鋼，不過因為係用嚟整嘢食，我唔知洗唔洗得乾淨，就算俾佢搵到，運返嚟香港，我都唔知仲用唔用得」，「我怪自己諗住慳少少錢，唔將已到倉嗰部分嘅貨先運來香港。如果我早一兩日，唔等埋最後嗰件貨，我只係損失百零蚊，而家損失1000蚊」，更說「諗住等多一排，睇下佢咩環境，再同佢傾賠償」。

更有網民留言指使用「4PX官運，13號之後失蹤咗…都唔知下落」，另亦有其他網民指透過另一些集運公司運貨，但仍未收到貨，未知實際情況。

有網民回應樓主指「應該可以追討，買咁多，唔追多都追少，我都係咁啱打風集運，打風第二日已經送到，快靚正，我間係BuyUp」。

不過，有增益的顧客指昨午已經與對方處理好賠償事宜，「第一次用增益買木櫃，浸水不能用了。他們說沒有保險，但老闆娘會賠，賠多賠少不等，看客人自己態度，有客人要全賠，也有客只賠部分」，「最後他們退我總價三分之二，應承我下次優惠運費…計埋我自己損失300蚊左右…好在增益算態度唔錯」。

根據「增益速遞」官方網站，寄件人可自行選擇為貨物購買保險，在快件發生延誤、丟失、損毀等情況時，可以填寫表格申請賠償，如果就賠償金額達成一致後，增益將在7天內作出賠償，但如果未能達成共識，寄件人可循法律途徑追討，但網站未有提及今次颱風的賠償事宜。