【好玩咩】女生拍貓鼠大戰片被斥虐鼠　死拗無惡意網民鬧不知悔改

電影或卡通片中貓和老鼠一向被視為天敵，有女生上載寫有「貓鼠大戰」的影片，顯示貓和倉鼠共處木箱內，貓隻不斷拍打倉鼠，倉鼠則試圖逃走。有網民發現影片，將其轉載至fb群組，質疑拍片女生有虐畜之嫌；涉事女生其後現身回應，指自己並無惡意，要求對方刪帖，卻遭網民批評「不知悔改」，被「起底」公審。

下載「香港01」App ，即睇城中熱話：https://hk01.app.link/l7U1Y7t5LO

有網民昨晚於fb群組「巴打絲打 Facebook Club」轉載一段從Snapchat截取的影片，顯示有人將一隻貓及一隻倉鼠放於同一木箱內，並寫上「貓鼠大戰」作影片描述。片中可見，灰色的貓隻不斷追着倉鼠，並以手拍打，狀甚好奇；而倉鼠則只能縮成一團，試圖逃走避開。

樓主於帖文直斥，「仲好意思話相處下，隻鼠都驚到瀨哂屎，仲話見危險就分開，不停拍打仲唔分開，係咪要拍死左（咗）就分屍呀，到底d（啲）人有沒腦」。樓主又質疑拍片女生「把一鼠一貓困在一個箱內，困獸鬥」，認為有虐畜之嫌。

帖文引起關注，大批網民看完影片後批評拍片女生「好明顯虐畜」、「應該立刻褫奪佢撫養權」，「條片睇到就得咁多，冇影嘅都唔知玩成點」。

拍片女生得知片段被轉載，即以私訊方式「現身」與樓主對話，她稱自己並非倉鼠的主人，拍片時亦有他人在場，必要時會即時將貓和倉鼠分開。她承認有做錯，但指自已並無惡意，有基本動物知識，解釋將貓鼠放於一起是因為牠們「相處左（咗）好一段時間，佢地（哋）係經常都會一齊玩」，並要求樓主協助澄清及刪帖，「你淨係睇到條片表面，就將你認為嘅事實講出嚟」。

拍片者似乎認為樓主將片段放上網令其惹來麻煩，語帶埋怨稱：「其實講真係都講晒唔係事件嘅嘢出嚟，我就算點解釋佢哋（意指網民）都係聽你講架啦」，又叫樓主「試吓將心比己，係你自己畀人Po上去」，「你諗下依家網絡上面有幾多人係淨係睇表面」。

拍片者有其說法，惟樓主及一眾網民並不接受，認為她「覺得自己沒問題，仲要怪返人post出來，話佢仲要亳無任何愧疚心」，「1d（一啲）悔意都無，只係識得瀨人」，「任何寵物都明知唔可以咁對待，仲要特登講到自己很有理據咁」，眾人不滿下，將女生「起底」，並公開其Instagram帳戶作「公審」，更指將會向警方及愛協報案，寄語拍片女做好準備「一堆籍（藉）口，既然咁有理據自己留返同警察講」。

（fb群組「巴打絲打 Facebook Club」）