同事列飲品清單　連登仔呻Last Day被屈買散水餅　問網民如何應付

Last Day派散水餅是一門學問，如何離別得優雅，散水餅得體與否是重要的一環。有網民近日在連登討論區發文，指本打算在last day（最後上班日）買西餅送給同事，誰知同事竟着他請飲台式飲品，還要求多多，令他大感無奈，因而詢問其他連登仔意見。帖文引起熱議，上載一天已吸2600個負評，不少網民都支持樓主拒絕要求，「掉咗佢，老奉啊而家」，亦有人指散水餅文化本來就很無謂。

下載「香港01」App ，即睇城中熱話：https://hk01.app.link/l7U1Y7t5LO

有網民昨日（23日）在連登討論區以「Last day被人屈買散水餅」為題發文，指因last day打算在午飯時間到餅店「求X其執十幾件餅就算」，誰知有同事竟遞上一張訂購飲料清單，着他到台式飲品店購買，「佢哋填晒話要飲咩」，還說「班老屎忽多多要求又話要少糖又話少冰咁」。樓主發文尋求意見，是否應「好來好去」還是「唔X係奉旨要買」。

不少連登仔都支持樓主拒絕同事的要求，「即場撕爛佢啦」、「扮收唔到算啦」，亦有人提出非常有創意的應對方法，如「拎杯茶行過去，飲一啖，我依家就share tea比（畀）你」、「買包檸檬茶叫佢哋自己share咗佢」、「同傳畀你個同事講，我唔飲啦，thank you」等，甚至選擇另類散水餅，「M記$10雞翼汽水」或預備一盒嘉頓什餅分給全公司。

有網民就認為如果做得開心，都不妨滿足一下他們的要求，「關係唔錯就算」，又指「少少錢都唔願畀，出嚟做嘢就大方啲」。不過亦有人不同意散水餅文化，「正常你走係班同事夾錢請你食」、「如果真係有幾個同事好friend，私下出去食個飯仲好」。