【熱評】政府年年派$2000　阿叔公開談論用醫療券買偉哥……

文：陸小菲
小菲嗰日陪朋友去探阿婆，阿婆行得走得煮到一枱畀我哋食，但係成枱有成五、六包中醫藥包。我問婆婆係咪有啲咩唔舒服無出聲，點知佢話：「無呀，我調理身子咋，我啱啱夠秤用醫療券嘛，啲老友記教我㗎，唔用過期，個政府難得有著數畀我哋香港人，唔用嘥晒。我都係睇中醫咋，佢哋（指教佢嗰啲老友記）買花膠、補品添啦。」佢講我知，醫療券最多可以累積到5,000蚊[1]，如果無病無痛齋儲就等於益咗政府，與其畀佢賺，調理唔到個政府都不如不如調理吓自己。

接著第二日小菲就響西鐵聽到兩個阿叔高談闊論講吓偉哥邊隻好。大家異口同聲都係百零蚊嗰隻唔掂，要買三百幾嗰隻先有效，大約半個鐘到，佢話萬x要醫生紙先買到，出去藥房買就不如去醫生度買。「醫生食水深好多，出面買至少平幾十，醫生實賺你，但醫生度可以用到醫療券嘛」、「你又啱呀，食一次玩得半個鐘。唔用醫療券真係肉赤」、「半個鐘，唔算耐」、「我同你呢啲年紀，唔用起唔到添呀」、「心臟有咩所謂，買完上去慢慢玩」。雖然阿叔對話其實各有各講，但小菲都聽得出佢哋無病無痛時醫療券的最大作用係買北上歡樂嘅道具。

其實，政府喺2009年開始就實施醫療券試驗計劃，當時50蚊一張，70歲以上每人5張。2013年加到1,000蚊，2014年追加到2,000蚊，當時最多累積4,000蚊。其實好似你打工仔儲假咁，如果儲埋唔用，同無畀假你無分別。啲老友記好醒，調理吓自己，調得幾多得幾多。

01觀點早就有講過，醫療券嘅普及同投訴成正比，食物及衞生局收到嘅投訴涉及懷疑詐騙和不當申報醫療券。當中4大落搭的普遍過案有四種：都係啲強身奶粉呀、貴價老花鏡、養生參茸海味，同埋見你用醫療券就開天價殺你一頸血嗰啲啦。但正所謂你精我都唔笨，雖然話奸商同無良醫生做法違背醫療券原意，收取歧視價格；但事實睇到老友記自己都好識利用。

[1]喂，話時話，估唔到啲老加記追得幾貼市。其實都係上年年中先將受惠合資格年齡由70降到65，啱啱今年先將累積由4,000蚊提到5,000蚊，估唔到老友記睇新聞追得緊過自己。

Facebook：陸小菲 Fifi Luk 與某種憂鬱的聲音

（文章純屬作者意見，不代表香港01立場。）