連登Post集合見工黐線問題　網民爆曾被面試者問「我靚唔靚」

說起見工，不少人都會感到緊張，擔心遇到意料之外的問題被殺個措手不及。有網民於連登討論區上發帖，問「見工被人問過最黐線嘅問題係乜？」，透露曾被部門主管問「其實你屋企經濟狀況係點？」，對方直指如見工者好需要份工嘅，「我咪信你會做得長囉」。
帖文引來網民熱烈回應，有人稱曾被問如「有無男／女朋友」、「錢重要定公司重要」、「你最低可以幾錢人工」、「我靚唔靚」、「覺得自己似乜嘢生果」等等。

一名網民日前在連登討論區上以「見工被人問過最黐線嘅問題係乜？」為題發帖，分享其應徵文職的經歷。他指見工時對方曾指公司工作十分繁忙，工作時間「日日例牌朝9晚8，連打風都要返」，質疑他是否「捱得」。惟最離譜的是部門主管查問：『其實你屋企經濟狀況係點？如果你好需要呢份工嘅，我咪信你會做得長囉』」。

樓主表示，當時他與該公司還未談到薪酬問題，「唔夠25k真係你做埋我嗰份，搵奴工唔洗(使)預我」。

有人見工時被問「你有無做開運動？咁有無攞過奧運金牌？咁你做運動嚟做咩？」、「我靚唔靚？」、「畀個原因我唔請你」、「覺得自己似乜嘢生果」，亦有人不過首次見面，就被面試官問「你覺得我個人點？」，又或者被問「會唔會做做下唔做」、「你覺得你上一個上司點睇你」，令人難以回答。

亦有面試官的問題觸及見工者的私人生活，例如問見工者有否男女朋友、同女朋友點識，又或者見工者家人的工作情況、家庭月入，及如何看待佔中等等，更有人見工時被要求讓面試者查看手機Wallpaper，令人費解。有人分享面試時曾被問什麼星座，成功入職後忍不住問當年的面試者，才知原來老闆迷信想知道是否夾得來。 

由於網民回應熱烈，帖文內集結了大量黐線見工問題：

你有無做開運動？咁有無攞過奧運金牌？咁你做運動嚟做咩？
講十個原因點解適合份工。
你屋企人返咩工？
比個原因我唔請你。
覺得自己似乜嘢生果？
會唔會做做下唔做？
你覺得你上一個上司點睇你？
我靚唔靚？(女HR問)
有無男朋友？(見工者是男性)
你覺得我個人點？

有網民就指見工時雖沒被問「黐線問題」，卻被面試官「花式壓價」，有面試者事先聲明「我覺得年青人唔應該計較一、兩千蚊」，使他心中感到不公平，「即係你條中坑就可以同我計嗰一、兩千」。樓主回應指，類似說話均是壓價前奏，例如「而家啲後生成日想得到又唔肯付出，咁點得呢」，再多說幾句之後便開出極低月薪，明顯低於面試者在履歷表上填寫預期薪金，卻又擺姿態稱「如果你唔考慮嘅話，咁都無謂浪費大家時間」。