親子活動掘復活蛋　沙塵滾滾似打仗　參加者：阿媽搏命掘唔理仔仔

一連四天復活節假期，不少家長難得放假，都會帶同小朋友到處遊玩。日前有商場舉辦掘復活蛋親子活動，聽落非常應節，但有參加者拍下掘蛋激烈情況，顯示現場「超級地塵土飛揚」，並指「啲阿媽痴線㗎，一入到場連個bb都唔理搏命掘」，有網民笑稱「睇相以為打緊仗，似伊拉克」。

網民Karin在Facebook群組「幼兒用品二手交易站」上載相關圖片，形容這是「可怕的掘復活蛋活動」，指周六（31日）到愉景灣參加掘復活蛋活動，結果一隻都掘不到，最後有姨姨看不過眼而將3隻復活蛋送給她們，樓主強調「大家千祈唔好參加三至四歲的組別！」

Karin表示，「啲阿媽痴線㗎，一入到場連個bb都唔理博命掘」，指現場塵土飛揚，還有媽媽叫菲傭照顧孩子，「自己兩公婆走入去掘」。她又說，明白到報名費頗貴，要200元，「但係都唔使咁呀」，指自己落場要拼命幫女兒「擋住啲大媽」，根本沒有時間掘。

從照片可見，愉景灣的大白灣沙灘人頭湧湧，站滿眾多大人小朋友參賽者，現場揚起很多沙塵，遠處還有一堆觀賽的市民。不過，樓主其後補充該圖片是5歲以上組別的比賽情況，並非她所參加的3至4歲組別。

Karin強調，主辦單位的工作人員態度好而且有禮貌，只是「大人真係有啲恐怖」，指其女兒本身掘到一隻，但被一名大媽搶去，「幾無陰公呀，我個女即刻攬住我喊呀！」她又指因3至4歲組別，大人可以一同掘，「所以啲阿媽為咗掘完可以換禮物咪癲咗囉！」

2016年愉景灣沙灘獵蛋奇兵活動照片

不少網民看到帖文都大感驚訝，「睇張相以為喺大陸」、「以為係戰地記者係（喺）廢墟影既作品」，又指看完照片加留言，「睇到邊啲係怪獸家長」。有其他參加者亦留言分享，指家長們都「瘋狂咁掘，細路完全企晒隔離」，甚至有人拿「農夫爬（耙）去掘」。不過另有網民稱，雖然沙塵滾滾，但小朋友和家長都玩得開心，亦不覺得有危險。

根據活動網頁，參賽者在沙灘內掘出復活蛋，就有機會贏取獎品，找到不同顏色的復活蛋可贏取不同種類的禮物，包括食物、玩具、酒店餐飲禮券、服裝現金券等，大獎價值逾2000元。