【預算案】下屆免費考 DSE　網民稱入場「玩吓」　考生：高抬貴手

財政預算案昨日（2月28日）出爐，當中提出為參加2019年香港中學文憑考試（DSE）的考生代繳考試費，引起網民熱烈討論，不少「過期中學生」均表示想報考DSE，一雪前恥，又有人戲言入場「搞事」等。今早財政司長陳茂波出席電台論壇則指，不排除多了一班「玩玩吓」的人報考，但問題不大。
不過，有多名下屆DSE考生投稿至facebook專頁「名校Secrets」批評，免考試費看似着數，「其實害死無數考生」，希望大眾高抬貴手，不要「貪得意去考下」。

預算案出爐後，「名校Secrets」刊登出多篇應屆DSE考生的投稿，指「多得政府唔少」，下年一定大把自修生入場「玩嘢」，見有網民稱會「玩盡Oral（口試）」，難以明白「點解可以咁黑心」，認為大家沒有考慮過他們的感受，「分分鐘就係因為你地玩一玩就令佢地冇得完成個口試，令佢地嗰part U咗，影響成科個grade」，又問「我地（哋）都冇得罪你地（哋），點解要做到咁盡呢？」

另有考生投稿稱，看相關新聞「睇到好想喊」，原以為只要努力讀書溫習，最後一定取得滿意的成績，但若下屆免考試費，必定有很多非應屆考生報名，「補習老師、學校老師、grad（畢業）左（咗）嘅大學生，甚至係純粹好奇心重（仲）想去試考嘅人都會有」，擔心競爭增加，考得高分變得相對困難。

投稿人又指最擔心語文口試，「如果成組都係勁人咁我唔洗考都知炒硬啦，咁啱撞正個專係搞事嘅又會死得更慘」，又說「好驚我咁多年所付出嘅時間同心機就咁白白浪費哂（晒）」，希望大家不要為了一己私慾毀掉他們的未來，「香港人唔好咁黑心啦」。

不過有網民回應帖文指，自修生跟應屆考生是分開「拉curve」（即調整分數），故「有料嘅你唔洗驚人伏你啦」，又認為那些「貪得意」報名的人不會跟樓主爭大學學位，「最終同你競爭嘅都係同屆嘅同學仔」；有網民則認為，應屆考生不一定會「蝕底」，始終自修生有本來的生活，難以抽空餘時間溫習操卷，最後都是「打天才波」，應屆考生則有專門的溫習時間，「畀啲信心啦樓主！」

根據考評局資料，文憑試的評級制度與舊制的香港中學會考和高級程度會考不同，不再使用「拉曲線」（拉curve）方式，即不再比對同屆考生成績，而是採用水平參照模式，參照相關科目的水平標準來匯報考生表現的等級。文憑試以5個臨界分數來訂定5個表現等級 (1至5)，第5級為最高等級。表現低於第1級標示為「不予評級」(U)，而考獲第5等級的考生中，表現最優異的，其成績將以「**」標示，隨後表現較佳的則以「*」標示。