【環台情侶】經歷3年異地戀　運動員的女朋友vs.港女OL的男朋友

一個是香港單車隊運動員，一個是典型香港OL女生，由「隱形同學」到相愛相戀，兩人的生活步伐截然不同，卻一起牽手走向第9個年頭。曾被譽為「下一個黃金寶」的香港單車隊前成員蔡其皓（Kyle），與中學女同學Niki相戀初期，本應是情侶間最熾熱甜蜜的時間，兩人卻先來3年異地戀，一年見面的時間不足兩、三周，牽一牽手、每一個擁抱都來得很珍貴。
捱過異地戀，Kyle在2014年退役，重返校園攻讀學位課程，去年大學畢業後展開新旅程，Niki決定辭職相伴，兩人騎着雙人單車環遊世界，終於可體現同步同行，彌補以往的空白。兩人的愛情故事，始於中學的班房......

緣起：「隱形同學」的facebook message

Niki：中學同班有個「隱形同學」，一放學就會消失咗，對佢印象好模糊，後來先知佢係港隊運動員。我中學畢業後去咗新西蘭留學，直至暑假返嚟香港，突然收到呢位「隱形同學」嘅facebook message，一傾就傾足一個月，畀佢有目標、積極嘅性格吸引，自自然然喺埋一齊。

Kyle：中學已加入港隊，每日都係無盡嘅訓練，無咩時間留喺學校。中三時認得一位同班女同學，覺得佢活潑好動又多朋友，但始終無太多時間同同學一齊，就無特別去認識佢。

到畢業後，嗰位女同學去咗新西蘭讀書，我哋嘅認識都僅限於facebook friend，偶然見到佢更新狀態咁囉。但喺18歲嗰年，睇到佢返咗香港過暑假，心血來潮好想傳個message畀佢，然後由fb轉到MSN傾計，再到最親密嘅SMS。

就這樣，一個長期在杭州集訓，一個回新西蘭讀書，開始這場每年只見到兩、三個禮拜的異地戀。

熱戀期：走過異地戀

Niki：頭3年絕大部分時間都係同視像鏡頭後嘅男友談情，就算幾掛住亦只能夠期待下次見面，但等待係斷年計，甚至期待咗一整年都冇見過。每逢其他人過緊浪漫嘅節日，好似情人節同聖誕節，我哋都唔會一齊過，佢成日要比賽，我又要讀書，唯有寫信畫卡，將自家製手作寄畀對方。

我都知我哋背景完全唔同，所以會努力喺電視同報紙了解男友比賽嘅情況，不過我哋都會透過視像電話同訊息聯絡，每日花好多個鐘頭傾大家嘅想法，主動關心佢，問「覺得點啊？有冇咩特別分享？」，盡力做到好似活喺彼此生命裏面咁，從來無錯過。

Kyle：一開始就要經歷3年遠距離拍拖，維繫方法就只有溝通，當對方不開心或者遇到問題時，雖然唔能夠陪伴喺身邊，但都會放低所有事先去解決。而家好多人都好易放棄，見到對方心情差就覺得自己處理唔到，寧願放棄，但我哋唔會咁，反而每次都會一齊諗辦法解決，慢慢建立信心，愈來愈相信愛情，結果一齊走就走咗8年。

等到Kyle於2014年退役，重返校園繼續學業，Niki畢業後亦回港工作，大家的約會方式終於回到真人見面，異地戀告一段落。直至去年，Kyle畢業後邀請Niki一起追夢，以雙人單車環遊台灣，彌補以往兩人的空白。

一齊追夢：訂造雙人單車環遊台灣

Niki：作為女朋友當然支持佢，如果佢有一個大過我嘅夢想，我可以做嘅就係一齊去做呢件事。與其4年都做住一份唔鍾意嘅工作，倒不如試下先，繼續留喺香港返工，幾年後都可能一樣。但我從來都唔係擁抱運動嘅人，由細到大都受濕疹困擾，一流汗就出，好痕，所以唔太鍾意做運動，單車環島係一個極大嘅挑戰，我唔敢想像。100公里有多遠？真係一啲概念都冇，但去咗先，我相信佢。

去到旅程第二日已經42度，曬傷咗，加上full gear（全套裝備）好焗身，有少少中暑嘅感覺。最記得有段路不停上山，攰到要死，我不停喺後面問「落山未？」Kyle一開始好耐心咁話「差唔多」，但咁樣一問一答重覆咗一個鐘，後來我學識咗唔再問啦，反正見唔到落山嘅路，有上就有落，有借就有還。

Kyle：始終做過運動員，一直以為雙人單車環台舒服無難度，但原來載住女朋友係另一回事。我哋拖住雙人行李加兩個人嘅重量，係好重嘅負擔，加起嚟有65公斤嘅行李，旅程第二日就決定捨棄十幾公斤嘢，然後先至可以繼續。

但原來沉重的行李背後，藏着Kyle的細心。

Kyle：以前嘅我好注意成績、速度同時間，但今次有Niki陪伴，佢拖慢到我睇好多唔同嘅事，有佢我先會留意，好感激佢畀到我呢段好好嘅回憶。

Kyle：以前去比賽，噴一次防曬就出去，但我預唔到同女仔去要帶幾多嘢，所以就同女友講：「盡情帶啦，無問題，我應該負擔得到！」結果Niki帶咗8支防曬乳、13套衣服、4對鞋，我哋仲有一支腳架、反光板同更衣簾，好似帶咗成隊crew（攝製隊）去咁，因為想喺荒蕪嘅地方影靚相，留啲回憶。當然最後統統都要捨棄，剩返3套便服、相機同最基本嘅單車裝備。

路途上畀狗追，或者成條路咩都睇唔到，仲有5公里嘅路一直被啲蚊迎面撞過來，沿途實在遇到太多估唔到嘅事，都唔能夠喺出發前同女友交代清楚，最後都係靠佢自己心態應付，我只可以做舒緩角色，同埋太曬嘅時候拎把遮出嚟。但去完之後，我都睇到佢轉變咗好多，而家會用「兄弟」嚟稱呼佢（哈哈哈哈）。

其實呢段環台路線，曾經係其中一條賽道，但今次同女友一齊踩，感受非常唔同。以前Niki只能夠喺電視或看台睇我比賽，賽事完咗先可以講返當中經歷，但坐喺雙人單車，前後座位好近，我可以叫佢「望下右邊」，佢就可以即刻見到。

Niki：佢係專業運動員，一定唔會好似我哋而家踩緊嘅速度，但佢仍然願意放慢腳步同我做呢件事，其實係好感動。keep住啦，帶領我去其他地方。

Niki：經過呢段比較刻苦嘅旅程，更加了解佢，佢嗰啲運動員特質出晒嚟，即使喺前面踏得辛苦，但一啲埋怨都冇，踩到連鹽分都散出來，佢付出好多，唔需要講你都睇到，喺後面嘅我都要加把勁。

Kyle專注嘅特質亦都好吸引，訂立咗前方目標就不斷衝，令我反思自己嘅人生。今次喺呢個強大後盾下勇敢地放手一搏，叫做心理挑戰又好，訓練下自己EQ（情緒智商）都好，總算完成咗一個從來沒想過的目標。

Kyle和Niki騎雙人單車拍下的環台靚相：