雙腸煲仔飯！港女以為臘腸潤腸　開蓋驚見另類「雙腸」︰欺騙感情

外出用餐，食物都未必合乎預期。有港女在秀茂坪光顧1間食肆，點選雙腸煲仔飯，以為有臘腸和潤腸，豈料開蓋驚揭食肆提供脆皮腸和黑椒台灣腸，苦笑詢問「係咪我理解能力差？」、「（食）個飯都欺騙感情」，重申菜單上沒有寫明是脆皮腸和黑椒台灣腸，網民笑言「覺得係詐騙啊」、「呢個世界冇咗信任」、「創作力量同幻想會嚇你一跳」。

樓主在Threads表示，日前光顧1間食肆用膳，點選了雙腸煲仔飯，餐牌上則沒有寫明是哪款腸，但開蓋後發現竟是脆皮腸和黑椒台灣腸，「開蓋嗰吓呆X咗，雙腸煲仔飯唔係應該係臘腸潤腸咩？」，不禁苦笑慨嘆「食開煲仔飯嘅人係唔會諗到臘腸潤腸會變咗脆皮腸台灣腸啩」。

帖文引來不少網民討論，「佢咁寫又好似冇錯喎」、「佢食埋個普通話音，『雙腸』、『香腸』」、「正常點會用呢啲腸嚟做煲仔飯㗎」，甚至有網民要求樓主開名。

根據樓主提供的資料，食肆位於秀茂坪，翻查網上外賣平台網站發現，其雙腸煲仔飯則有寫明是脆皮腸和台灣腸。