首爾、釜山、京畿道5大特色壁畫村　韓國自由行打卡必去！

自從韓劇時不時都會以壁畫村作為拍攝場景之後，壁畫村就成為咗韓國旅遊嘅熱點項目，唔少人都特登走去影下相，做下文青。究竟韓國壁畫村有幾多呢？等我幫你盤點幾個韓國比較出名特別嘅壁畫地段啦！

一、梨花洞壁畫村 (Ihwa Maeul) ——首爾

由於梨花洞係韓國劇組經常取景嘅地方，加上有韓國當地綜藝節目介紹，令到梨花壁畫村成為全韓國最出名嘅壁畫村。自2006年開始，首爾政府推動「駱山藝術 2006」，同逾60位藝術家進行舊區美化。最近，梨花壁畫村部分階梯（兩條分別畫有花同魚嘅樓梯）暫時封閉，想去嘅朋友可以留意返。

二、行宮洞壁畫村 (Haenggung-dong Mural Village) —— 水原

行宮洞壁畫村位於水原市北水洞一帶，屬於規模較細嘅壁畫村。北水洞一帶屬於市內嘅舊區，位處華虹門附近，大部分都係八十到九十年代所建造嘅住屋。除咗壁畫之外，附近仲有兩間畫廊，包括Alternative Art Space Noon同埋Space Bom，對藝術有興趣嘅朋友不妨一去。

三、滋滿壁畫村 (Jaman Mural Village) ——全州

滋滿壁畫村同其他壁畫村一樣，有唔少藝術家同畫家進駐，比較特別嘅地方在於滋滿壁畫村有比較多嘅卡通人物壁畫。成個壁畫村依山而建，大部分嘅屋都位於山腰，感覺上同台北嘅寶藏巖差唔多，行到頂就可以睇到全韓國最大嘅韓屋村（全州韓屋村）。

四、甘川文化村（Gamcheon Culture Village）——釜山

甘川文化村位於山腳位置，係韓國規模比較大同多元化嘅藝術村，大家可以沿住梯級同巷弄慢慢探索充滿藝術嘅社區。入到文化村門口，可以喺附近嘅旅遊咨詢所買一張地圖，除咗可以方便參觀，仲可以玩遊戲添！反轉張地圖，就會發現係個儲印仔嘅遊戲，一路參觀一路吸印仔，儲齊仲可以換post card。睇壁畫之餘，記得參加村內嘅各種工作坊，帶走屬於大家嘅回憶！

五、松月洞童話村（Songwol-dong Fairy Tale Village）—— 仁川

松月洞自從仁川喺1883年對外開放港口嘅時候就已經存在，早期主要係外國人嘅聚居地，後期因為年輕人外流導致松月洞開始沒落。韓國政府為咗改善區域環境，就開始用童話故事去重新設計松月洞，形成今日嘅童話村。叫得童話村就梗唔少得公主同王子，當然仲有唔少大家由細睇到大嘅卡通人物，去嘅時候即管睇下自己認得幾多個！

【本文獲「KKday」授權轉載。】