【韓國．釜山】KPOP迷注意！十月必去三大慶典 睇完煙花追OPPA
一年容易又秋天！話咁快又到咗紅葉季，相信釜山都會係唔少人賞紅葉嘅選擇。而十月嘅釜山除咗有紅葉睇之外，仲有三大國際節日盛事會舉行～如果你嚟緊十月都計劃去釜山嘅話，咁你就絕對唔可以錯過國際煙火節、BOF同電影節呢三大釜山國際慶典啦！
1. 釜山十月必去！釜山國際煙火節
每逢十月，釜山就會開始熱鬧起嚟，世界各地嘅旅客都會湧去釜山，為嘅就係一年一度嘅釜山盛事—國際煙花節！釜山國際煙花節嘅起源係為咗慶祝2005年APEC高峰會議，於是就喺附近嘅廣安里放煙花，結果大受好評，所以就決定每年10月尾都會舉辦煙花表演～去到今年已經係第13年啦！成個表演歷時一粒鐘，表演總共分為多媒體煙花表演、華麗音樂鐳射燈光表演、海上表演等等多個部份，一定會令你目不暇給。
煙花會喺廣安里海水浴場附近施放，璀璨嘅煙花喺釜山夜景嘅襯托下，特別奪目吸引！當地韓國人甚至會帶埋炸雞同啤酒，一路睇煙花一路嘆～試幻想下一啖凍冰冰嘅啤酒，一啖熱辣辣嘅炸雞，再加埋璀璨嘅煙花，個feel真係超正！如果錯過咗就要等一年先再有得睇㗎啦～
小貼士：雖然大多數嘅遊客都會揀喺廣安里嘅海灘上面欣賞煙花，不過小編更加推薦你去附近嘅荒領山、二技台公園，除咗唔洗同人迫之外，視野仲更加廣闊！
活動日期：2018年10月27日
地址：釜山廣域市水營區廣安海邊路219 (廣安洞)
活動地點：廣安里海水浴場及廣安大橋一帶
交通：搭乘40、41、42、139、1001、1003號市區巴士，到達廣安里後落車。或者可以搭地鐵去金蓮站（3或5號出口）或廣安站（3或5號出口）。
2. One Asia Festival 同一個亞洲文化節（BOF）
各位韓迷注意！2016年首次舉辦嘅釜山同一個亞洲文化節，係亞洲最大嘅韓流慶典，吸引世界各地嘅KPOP Fans去釜山朝聖。今年One Asia Festival會喺10月20日再度襲捲釜山！
為期8日嘅慶典除咗可以睇到依家最紅嘅KPOP明星演出，仲有多種風格嘅戶外音樂會，並會喺最後一日舉行頒獎典禮。身為KPOP迷嘅你心動不如馬上行動，如果唔係會後悔莫及㗎～
▼▼韓國男團EXO▼▼
▼▼Wanna One▼▼
▼▼SEVENTEEN▼▼
▼▼NCT127▼▼
開幕演唱會嘅出演名單小編依家就嚟話你知！EXO、WANNAONE、SEVENTEEN、NCT127、CELEBFIVE 等都會喺釜山亞運會主體育場嘅舞台表演！近距離睇到佢地唔再係夢，快啲準備出發啦！
【開幕演唱會】
活動日期：2018年10月20日至10月28日
地址：釜山廣域市蓮堤區世界盃大路344（座標：35.190107, 129.058209）
活動地點：釜山亞運會主體育場
交通：搭乘釜山地鐵3號線至綜合運動場站9號出口或社稷站1號出口落車。
3. 釜山電影節
釜山國際電影節由1996年起開始舉辦，依家已經發展成為韓國規模最大嘅國際電影節，亦係世界矚目嘅電影盛會之一。每年釜山電影節都會邀請到重量級嘅韓國明星，例如上年就有張東健同潤娥做司儀！如果十月計劃去釜山嘅朋友，不妨試下嚟電影節舉辦嘅場地碰下運氣，話唔定可以遇到你嘅男神／女神！而且影展期間都會播放各國嘅精彩電影，鐘意電影嘅你就一定唔可以錯過啦！
唔講唔知，釜山國際電影節就連舉辦嘅地方都係釜山嘅知名建築，場館有世界最大規模嘅屋頂建築設計，每當夜晚燈光亮起再同附近江邊、公園嘅夜景交織埋一齊，形成無比夢幻嘅場景～
活動時間：2018.10.4 ~ 2018.10.13
地址：釜山廣域市海雲臺區
交通：撘釜山地鐵2號線，到Centum City站，再轉5-1、36、39、40、63、115、139、141、155、181、307、1001、1002號巴士，喺新世界百貨公司前落車後，行5分鐘
記得十月份去釜山嘅話千祈唔好錯過呢三大盛典啦！
【本文獲「KKday」授權轉載。】