ZANCO tiny T1開箱比你想像中更細 超微型手機行山最啱
ZANCO tiny T1 這款手機主打微型！話自己話可能係世界上最最細嘅電話，聽落都覺得好想試下。想當年用過叫做全世界最薄嘅電話係 Sony Ericsson，但當今日各大智能手機都追求大得來又好揸手嘅時候，估唔到會有廠商推出極細手機。
到底有幾細呢？諗一諗放得落張 nanoSIM Card 又唔可能太細隻啦！因為都要放其他線路版，仲要放得落喇叭、鍵盤等，細極點都有個譜。
點知……開箱一睇真係細到有啲過份…
ZANCO tiny T1 手機個盒平平無奇，當你以為個盒好細，已經係部機嘅實際尺吋時，打開發覺部手機仲細，真係好細，連個盒嘅二分一都無，大概係盒嘅六分一，好誇張。
最過份係你竟然仲見到部手機有個屏幕，而屏幕下面仲有五粒掣，再下面仲有 12 粒傳統數字撥號鍵盤設計，真係手指大啲都用唔到。
好難形容到部手機有幾細，所以直接拿個 micrUSB 轉 lightning 插頭來比較，只係大個插頭少少，機身只有 46.7mm x 21m x 12mm。
規格上佢係用 MTK6261D，行 2G GSM850、GSM900、DCS1800 及 PCS1900，有 32MB RAM + 32MB ROM，得一個 0.49 吋嘅 64 x 32 解像度 OLED 屏幕及 200mAh 電池。
一部咁細嘅機有咩用呢？佢可以掛在鑰匙包而毫不突兀，或者行山出外、跑步時掛於褲頭或者袋內都唔會阻住。當然，你唔好以為呢部電話可以幫你上 FB、影相或者做啲咩超勁行為。
佢最大嘅賣點就係細細部有 3 日待機，180 分鐘通話時間。就算行錯路想打電話問朋友都唔駛驚電話無電，絕對係一個遠行者必備嘅電話。依家咁多人鍾意揹住個背包去旅行，整返部保平安就啱啦！
HTC入門級手機Desire 12+即日上市，旗艦機U12+上市有期！
【本文獲「Mobile Magazine」授權轉載。】