歐聯16強 超平plan合法睇盡！百幾蚊手機電腦平板OTT四圍睇

OTT（Over-the-top）直播球賽其實已經不是新鮮事，早幾年就已經有一間是是旦旦的電視台OTT世界盃俾大家睇。不過由於歐聯版權由某付費電視台持有，非用戶想搵辦法睇，唯有半夜跑落酒吧。最近天寒地凍不想落街睇波？幸好該付費電視台終於追上科技潮流，最新推出的平價「體育通行証」，就等大家可以一次過睇晒歐聯16強及其他體育頻道節目。

今次有線推出的「168有線體育通行証」非常抵玩，只須一次過繳付$168，購買由2月起到8月31日多個月該付費電視服務，就可以於一台iOS或Android流動裝置上觀看有線多個節目，當中包括歐洲聯賽冠軍盃（歐聯）、 德甲及德乙組、 日職聯、 澳職聯、 2019 FIBA籃球世界盃資格賽、 東南亞職業籃球聯賽等多項賽事。整個服務讓用戶可以收看多道體育及賽馬頻道，包括足球台、體育台等，還有不少人喜歡的新聞台都包，真心抵睇！

該付費電視台cut台困難早成佳話，YouTube甚至有網絡紅人惡搞希特拉片段，諷刺連獨裁殺人魔一樣cut不了。不過今次這個平價睇波plan毋須簽約，而且免收高清解碼器安裝費及租賃費，就可以透過電視、智能手機、平板電腦及電腦等多種途徑享用服務，似乎是電視台方面終於瞭解踏入OTT年代之後失地太多，要急起直追。