HG突擊自由高達極海量囤貨打擊炒賣｜炒家發文爆SEED怒吼：公平咩

HG突擊自由高達極海量囤貨打擊炒賣、炒家發文爆SEED怒吼：公平咩｜SEED FREEDOM 高達 HG 1/144 突擊自由高達極重頭作5月25日上市，日本炒家大手掃貨後，BANDAI竟忽然派發了海量貨落日本市面，有炒戶似乎因此賠本損手，竟在討論區上發文投訴BANDAI「反對增產」、歪理連篇。

妄想一盒「HG極突」賺3000日圓

原來BANDAI早就預計HG突擊自由高達極需求甚大，誓必被炒家掃貨；在6個月前已經開始安排廠房24小時增產，睇準第一批貨被炒家搶購後，忽然將囤貨多月的海量模型一次過推出市面，連便利店都有貨，旨在人人買到、打擊模型炒賣。

炒高達無罪！萬字奇文反對BANDAI增產

資本主義社會自由市場、炒賣轉售不犯法，但價錢當然亦有升有跌，炒家平時牙刷刷，點知BANDAI一招囤貨就被打殘，有炒家在Yahoo 知識寫了萬字奇文表達不滿，當中的理論有多扭曲？馬上睇睇！

（以下為日文原文截圖，再下面有廣東話翻譯版)

【反對增產突擊自由高達極，有必要連便利店都賣模型咩？】

呢件事搞到我哋呢班轉賣屋（炒家）研修會要開緊急會議😡
集會啱啱先完，好多人心中一肚火，好想問候人伯母😡

我哋成班炒家本來傾好晒，2970日元入貨，再用6800日元賣出，每賣1盒可以賺3000日圓，有成20幾人入咗好多貨。點知你轉頭就嚟增產，真係有必要連便利店都賣模型咩？（今次萬代在日本安排到連Fami mart、Lawson都有貨）我哋仲有好多行家住得好遠，花高昂交通費去台場Gundam Base入貨，你咁樣增產搞到我哋全部貨蟹晒！公平咩！

BANDAI應該感激炒家、唔係封殺

如果唔係我哋炒家推高Gunpla（高達模型）嘅價值，人人都搶被受矚目，點會有今時今日嘅人氣？我哋轉售商一直相信自己有份為呢個人氣產業作出貢獻、倍感自豪，點解而家會落得如此下場？

真相其實係畀蛇頭搵笨

明明研修會（研修會其實即是一班炒家蛇頭、收學費教人炒高達，再帶班學生去台場掃貨，再同佢哋收購批模型，詳情可以睇另一篇文：高達模型炒賣特訓班學生炒MGSD怨嫌得少｜網民：美化炒賣仲唔知足）同我哋講，如果努力轉賣高達模型，一年賺1000萬日圓唔係冇可能，點知連續幾隻飛升自由、不朽正義全部都蟹晒，通街都係貨，GW（日本黃金周）根本一隻都賣唔去，通通都係搵笨。我仲開始覺得，個班所謂靠炒高達年收八入2000萬嘅王牌炒家，睇真啲部車又舊又爛，仲有人見到佢哋半夜去吉野家兼職，根本係吹大咗。

炒賣提升高達形象、增進爸爸與子女溝通

想買高達模型？落便利店都有啦！而家Gunpla已經變成咁cheap嘅嘢，班細路仲點會對佢感興趣？再咁落去Gundam食得屎啦！一定要做到人人都想買，但買極都買唔到，物以稀為貴，咁樣商品先至會有魅力㗎。

我哋炒家就係想令到細路買唔起，大人先買得起，咁樣爸爸就可以增進同子女嘅溝通，根本係用心良苦，我哋都係為咗細路嘅笑容，先忍痛高價轉售高達啊！

唔少轉售商本來都有正職，但喺公司過得唔如意，仲畀權力壓迫、無辦法再打工，先至會去做轉售。我哋面對人生逆流，勇敢咁轉型，想逆轉乾坤改變命運，點解萬代連呢啲小小嘅投資機會都要阻頭阻勢？

高達變晒蟹、冇得退訂炒家點生存？

零售商搞多新條款去阻我哋退貨，訂咗未到嘅想cut單，點知連訂金都拎唔返。你班網店同零售鋪，點解可以對客人嘅損失擺出一副事不關己嘅嘴臉？

以前炒到冇貨，我哋炒家都會退錢畀客人啦，而家到我哋囤貨，又有邊個可憐我哋？仲有呀，唔好講拎黎炒，正常買家睇見一街都係貨，唔覺得搶到勁嘢嘅成功感打咗折扣咩？

作為Gundam粉絲，希望各位發表意見。

搵食啫？我想㗎？

講多句：雖然被人誤解，你為咗人人有高達玩就增產，但點解要無視將高達當作投資，從而獲利嘅人，咁樣做生意既咩？真正高達fans之前都出錢出力，不惜一切去搶；而家變到唔使任何努力就買得到，你點對得住一直以嚟付出極大代價入貨嘅高達真粉？

你班網民成日覺得炒家自由自在、唔使返工、唔使交稅，冇錯當中可能真係有人年收達到2000萬日圓，明你哋好嫉妒，但更多人其實只係靠轉售吊住條命咋！

各位高達fans，連出高價買模型、幫助生活窮苦炒家嘅慈悲心都冇？

就係因為咁，所以日本先會出現少子化啊！

總結，其實記者覺得呢篇係曲線抽水潮文，但因為實在太搞笑，所以先以港式口語文法翻譯，當中一些用詞或跟日本原文有出入，但只係想大家都有得笑。