VPET職出真我｜興趣變職業　打機結合編程成遊戲設計總監圓夢

唔少年輕人都鍾意打機，但有無可能將興趣發展成事業？Vincent自細嘅夢想就係可以創作自己嘅遊戲。因此，喺讀書時期由電腦讀到多媒體，再加上網自學，後來透過業界活動終成功入行，𠵱家已成為遊戲設計公司創意總監。

遊戲產業求才若渴，好在多間大專院校都有開辦相關職業專才教育（職專教育）課程。職專課程唔單止為學生打好基礎，導師亦會介紹同學入行。𠵱家Vincent亦以導師身份擔任後輩嘅指路人，眼見佢哋打機都不忘學習同業嘅技術，深深感受到新生代嘅熱情，深信行業發展將會愈來愈好。

政府近年大力推動創科及文化創意產業嘅發展，根據統計處數字，2021年產業為香港經濟貢獻咗1,248億元，其中遊戲產業興起，帶動本地相關人才培訓亦愈見規模，唔少專上院校例如職業訓練局（職訓局）有推出遊戲軟件開發高級文憑，香港中文大學專業進修學院都開辦電腦遊戲開發高級文憑等，無論係想入行嘅學生定想在職進修嘅人士，都一定有途徑學到相關知識。

Vincent要實踐創作自己遊戲嘅夢想其實一啲都唔容易，佢話讀書時已經好想入行，但當時無專屬遊戲設計嘅課程。於是，就讀電腦程式設計讀到碩士，再讀多媒體，但真正要設計遊戲，好多時佢都只能靠上網搵資料自己摸索。後來Vincent參加遊戲育成計劃，識到業內人士了解更多行業資訊，先搵到入行門路，輾轉成為遊戲設計師。

遊戲公司總監談入行：修讀職專課程打好基礎較易入行

今時今日Vincent已經係遊戲公司設計創意總監，佢話雖然網上資訊同教材好多，但新手要搵到有用資料都唔容易，好多時「搵料要用咩關鍵字都唔知」，所以認同系統化學習真係好重要，而且導師又會轉介學生入行，「職專課程提供基礎畀學生了解做遊戲嘅流程、點樣編寫遊戲系統，而家要入行真係比我以前易好多」，仲形容目前行內係老闆急要「搶人才」，多過求職者趕搵工。

講到工作前景，Vincent就話遊戲設計業嘅新手，入職後一般會先負責介面設定，亦可能要負責場景設計，晉升後就會逐步負責編寫遊戲比較核心同系統性嘅內容。

根據政府人力資源規劃委員會同職訓局嘅資料，現時新入職嘅遊戲設計師月薪介乎1.5萬至3.5萬元不等，因應佢嘅表現同經驗繼續發展，當晉升到高級遊戲設計經理時，月薪可增加到5萬至11萬元，發展空間同薪酬水平都同樣吸引。

加入遊戲設計行業最緊要有熱誠　技術不停提升需持續進修

不過Vincent都提醒返想入行嘅年青朋友，現時設計遊戲已不只局限於手機遊戲，仲包括虛擬實境（VR）、擴增實境（AR）甚至元宇宙，「時代不斷進步緊，遊戲技術、軟件同硬件其實都不停提升緊」，他認為年輕人入得呢行真係隨時都要學新嘢，不停接觸同學習全新嘅技術，「其實係一個挑戰嚟嘅，即係你要覺得遇到唔同嘅System，就要開始去自己再去學習，先可以做到吸引的遊戲。」

作為遊戲設計課程導師嘅Vincent認為年輕人都可以將興趣發展成事業，「我以往教一啲學生，佢報得寫遊戲呢，佢自己都好鍾意打機嘅，咁玩嗰個途中唔係淨係齋玩，佢仲會好自發性咁樣諗個技術人哋做到，自己又會唔會可以做到呢？」，Vincent話學生在玩之餘，同時吸收人哋喺技術層面同系統上嘅技術，佢好欣賞學生們嘅投入，希望可以引導學生，幫佢哋好似自己咁，透過職專課程同努力創新下，終有一日都能夠做出自己嘅遊戲。

職專教育最近推出全新主題「職出真我」，鼓勵學生將興趣發展成專業，發展出屬於自己嘅天地。想了解更多職專教育詳情，就唔好猶豫即刻登入職專教育網頁，同埋Facebook、Instagram專頁。網頁詳細列出唔同職專教育嘅課程、行業、相關資歷階梯，一睇即知行業嘅發展前景，有需要仲可以用埋網頁嘅課程搜尋功能，只要輸入有興趣嘅行業或者院校名，一Click即睇晒相關課程嘅報讀資訊。

為咗令大家更加了解職專教育下學生點樣打好基礎再投身職場盡展所長，《香港01》先後請嚟幾位唔同專業界別嘅朋友，佢哋包括遊戲公司總監、網絡顧問、攀

樹員、放射師，以及升降機技術員學徒等等，分享佢哋學以致用嘅故事，等大家更了解各行各業發展，以及職專教育的關鍵作用，萬勿錯過。