曾俊華自爆做過無牌三行　點歌給林鄭CY：《Let It Go》

前財政司司長曾俊華出生香港，童年與家人移民美國，他今日（13日）在大學接受其前政治助理羅永聰的港台節目訪問，自爆在當地曾做過無牌三行工人，「幫人僭建」。
曾俊華現為電台音樂節目DJ，有學生好奇他會送甚麼歌曲送給現任和前任特首，曾俊華點唱卡通電影主題曲《Let It Go》，究竟有何含意，大家自行揣摩。

13歲移民美國的曾俊華在當地名牌大學讀建築系，畢業後順理成章當上則師，專畫廁所圖則，做了幾個月，他的同事稱「畀心機呀，畫好呢啲嘢就可以畫停車場㗎啦」，曾俊華自覺「頂唔順」便辭工，甚至轉行做「無牌三行」，他笑言這份工作「同人呢就...其實係同人做僭建嗰啲咁嘅嘢啦」，當時連電和水喉都要安裝，他覺得這份工作好玩和學到很多東西。

當上「無牌三行」幾個月，有朋友建議他應徵當地教育局的工作，與其他見工者不同，曾俊華當時穿著工人牌、袋著鎚仔面試，最後卻獲聘，翌天便上班。

主持羅永聰在曾俊華任財政司司長期間一直陪伴在側，甚至曾俊華2017年請辭參加特首選舉，羅亦離開政府，他席間再問曾俊華參選特首的原因：「我作為紀錄嘅人，你真係冇公開講過，同當時特首嘅作風、佢管治香港嘅作風有冇關係？」

曾俊華猶豫一刻，答：「如果話冇關係你都唔信啦！」他憶述，大約2016年起，特別感覺到愈來愈多市民給他的說話和眼神都懷著很大期望，又覺得有些事情應該改變和提高管治底線。被問及是否新一屆政府可以管治的自由度和空間，他表示認同。

現場有人關心曾俊華會否再次參選，曾俊華打趣：「第一次真係成個passion（熱情）咁樣去做，同埋期望去做，我諗如果我第二次再去就係撼頭埋牆架啦。」此時羅永聰「提醒」曾俊華，新民黨立法會主席葉劉淑儀打算出選立法會超級區議會界別，曾俊華形容「有啲人個頭係硬啲」，語畢即引起哄堂大笑。

選舉落敗，退下官場的曾俊華現時在電台當DJ主持音樂節目，有學生問他會送哪兩首歌曲給現任和前任特首，曾俊華就如此挑選：「我就揀一首近期啲嘅歌啦，我成日都聽到，因為我孫女經常成日唱嘅，就叫做《Let It Go》。」羅永聰問點唱給誰，曾俊華稱「兩位都啱」。

羅永聰在結尾問，如果香港是一個病人，香港今天有何痛點，曾俊華認為是香港撕裂，即使現屆政府上場後都沒太大改善:「呢啲嘢其實好多都係人為嘅，點樣可以將呢啲事情減低佢呢?多啲係正面嗰方面嘅嘢做，唔好係反面嘅嘢...」羅永聰問是否即「LET IT GO」，曾俊華附和「LET IT GO」。