翁三姑的9+1：《黑社會主義好》個概念，係同我爸傾計諗到！

不是米奇老味神奇屋蜜蜂翁，他是情歌王子翁三姑，雖然缺乏戀情經驗，但是一個資深的情歌樂迷！看看翁三姑的9+1專輯推介。

告訴我十張影響你畢生的唱片──不，九張便行，加上一張你有份參與的，唱彈或編製，專輯或單曲也好，對你的影響不輸任何經典專輯吧？

扭耳仔新欄目9+1，每周找來音樂人物，抄錄他們的聆聽喜好，看其所愛，聽其所聽。

1. Taylor Swift 《 Speak Now 》 (2010) 

我鍾意Taylor swift 嗰啲舊歌，尤其是呢隻又pop又country ，兩種好多人討厭嘅音樂genre。我覺得其實好多人鍾意Taylor swift ，係因為佢地唔鍾意Taylor swift 嗰啲聽眾，反而對Taylor swift啲歌有冇乜大問題。我梗係覺得好容易聽，一聽就鍾意唔使聽20次三十次先發覺原來係好有深度或者好有創意嗰啲，唔使嘥時間培養呢啲感情。即係好似喺沙灘見到一個THOT嘅時候，就識欣賞佢嘅美麗，唔使傾計就可以好有feel。同一時間你越聽就越知道呢個女人，我係唔會同佢結婚生仔，只不過係欣賞佢嘅美麗。

2. The Killers 《 Direct Hits 》 (2013)  

我好鍾意The Killers 佢哋嗰種風格，無論佢哋新嗰隻或者舊果隻專輯，我都覺得佢哋好保持到佢哋嗰種嘅style同埋都好好聽，呢個其實係好罕有。裏面嗰啲歌嗰啲旋律係好獨特，好難搵到呢一種聲音係其他Band入邊。其實諗過想唱〈 Mr Brightside 〉 係三姑 season 2 但係可惜香港冇乜人識欣賞呢一對band。仲有就係佢哋嗰隻聖誕碟其實超好聽，不過無人聽。

3. The Low Mays 《 黑社會主義好 》 (2017) 

我諗呢隻唔使講咁多啦，根本就係香港樂壇歷史最震撼嗰隻專輯。同埋其實黑社會主義呢個概念，係有一次同我爸傾計諗到。

4. Pink Floyd 《 The Wall 》 (1979) 

我覺得 《 Wish you were here 》其實好聽啲不過《 The Wall 》嗰個題材講開 loneliness 同埋明星生活外面多姿多彩，其實內裏充滿煩惱係非常之relatable。 嗰個人其實生命入面嘅夢想、遺憾、傷痛，同埋快樂都係冇人可以感覺到，但係同時間個個人都可以感受到果種嘅loneliness，就係我覺得呢個專輯嘅特點。

5. Serrini 《 Don’t Text Him 》 (2017) 

我第一次聽呢隻碟，簡單諗咗下WTF？但係越聽越好聽，聽聽下就喺度唱，唱唱下就變咗個女人。 我聽完呢隻碟之後，就覺得我需要講返，其實係愛情上面做男人都唔係咁簡單，有fucc boi 自然梗係有fucc girls, (不過社會叫佢哋strong and independent woman)，所以我就決心要做好三姑比啲男人有返把聲，唱下佢哋嘅心聲。唔可以比serrini 係咁亂咁講話，所有直男都係fucc boi 其實大部份嘅直男都係三姑。

6. Air Supply 《 Making Love ... The Very Best of Air Supply 》(1980) 

我細個嗰陣時爹哋媽咪揸車剩係得一餅帶喺架車度，就係呢個專輯。由細聽到大，而家再聽返係會非常懷舊諗返，我坐係架波子嗰啲皮凳上面嗰啲回憶。我阿爸仲話佢追我阿媽嗰陣時，整咗啲mixtape比我阿媽然後入邊都有啲Air Supply，所以我喺度笑老豆追阿媽嗰陣時send啲分手歌比佢聽？

7. the Script 《 Science and Faith 》(2010) 

我阿哥去咗外國留學嗰陣時，開始識聽啲英文歌，跟住佢就介紹咗幾首嗰陣時幾紅嗰啲歌，有一首〈The Man Can’t Be Moved 〉係我細個嗰陣時最鍾意聽嗰一首歌。我間小學好怪，要迫學生睇場音樂會，跟住要寫歌report 講感想。個次我唔記得咗睇，但係啱啱好The Script 嚟香港開show，所以我就用呢個藉口睇我咁大個仔第一場嘅live音樂會。雖然果次佢哋未紅，唔係好多人去睇而且我記得係AsiaWorld-Expo好似得半個場左右，但係我印象都好深刻。依家佢哋紅咗，啲歌又麻麻哋冇諗住睇返佢哋live，但係我唔會忘記嗰次，佢哋香港細細地嘅concert其實仲好。

8. 周杰倫 《 十一月的蕭邦 》 (2005)  

細個嗰陣時比阿媽迫學彈琴，所以細個嗰陣時覺得音樂對好反感。大個咗有咗第一個MP3 player 嗰陣時就開始欣賞音樂。呢個係我印象最深刻嘅一個中文專輯，之後我就開始聽英文歌。

9. Coldplay 《 Viva la Vida  》 (2008) 

呢個又係我阿哥介紹嘅一隻專輯，喺佢留學嗰陣時紅到爆，《Viva la Vida》 係一首令我開始慢慢識聽英文歌，所以雖然呢個唔係我最鍾意Coldplay 嗰隻碟《Rush of blood to the head》但係我非常尊重呢隻碟，係我人生嘅影響，如果唔係我 一開始就聽Coldplay我都唔知我今日會唔會咁basic，一睇下呢幾張專輯，已經知我係幾咁basic，但係我又唔係好覺得好差，因為pop 係popular即係好多人聽姐，如果你鍾意大眾嘅嘢咁咪即係多啲人可以一齊欣賞，咁咪幾好囉！

+1 翁三姑《 獨·姑蹤 》(2017) 

我第一隻大碟，其實對我來講係遠遠超越左我所有期望。我根本唔係一個音樂人，我唔識數拍子，中文程度差到貼地，完全唔知自己點解要做啲咁嘅嘢，唱唱下先發現原來呢個係我生存嘅原因。我要唱啲已經唱過好多次嘅中文情歌，但係我亦都要(做)第一個(原)唱嗰位三姑。歌入邊嗰啲聲音全部都係自己唱，要自己整咗一隻CD先明白其實每一首歌可以花幾多心機落每1秒，每一把聲，而家我係好欣賞同埋佩服嗰啲真係自己寫同埋自己唱嗰啲嘅歌手。要靠自己嘅實力來紅係真係好難，尤其是而家好多個都係跟返一個formula 咁寫落去或者咁唱就會紅，所以我咪跟返個formula 囉，做乜要做啲咁難嘅嘢？