【靖聽音樂】結他手和他／她的形象｜黃靖

人哋話：「你的樣子如何，你的日子也必如何。」

而作為一個做幕前嘅表演者，形象絕對係表演嘅一部份。當形象和音樂配合得天衣無縫，你可以幫觀眾更容易進入你音樂建構緊嘅世界。

如果披頭四喺1967年推出嗰一張《Sgt. Pepper's Lonely Hearts Club Band》唔係着住迷幻鮮艷螢光彩色嘅復古軍裝，我哋做觀眾嘅可能就感受唔到佢哋音樂世界的完整性。又或者David Bowie在1973年嘅時候唔係化咗一個閃電妝，佢嘅經典作品《Aladdin Sane》整個概念同埋音樂根本就唔成立，亦把glam rock的形象推到另一層次。

咁當然會有一啲音樂人覺得好多好叻好出名嘅結他手譬如Gary Moore，Ry Cooder，Tommy Emmanuel都冇乜講究形象啦，佢哋咪一樣咁勁？

Gary Moore同Ry Cooder 一個玩Blues一個玩Country／Folk，兩個音樂世界都係玩樸素、玩平民，如果佢哋dress up先至覺得奇怪。至於Tommy Emmanuel技術高超到一個境界就真係着乜都冇人理啦！佢唔着衫都無人夠膽講咩。當然如果你做純音樂你唔想有任何視覺元素擾亂觀眾，咁你全身着沉色黑色衫係非常合理，但係請留意呢一個選擇已經係一個服裝上的決定去幫觀眾投入你嘅音樂。

Jimi Hendrix當然無David Bowie去到咁盡，但係其實佢係形象同埋服裝方面都非常講究。佢嘅服裝主要有兩種，復古將軍軍裝同埋鬆身幻彩嬉皮士；兩者都賦予佢狂野爆裂輕狂嘅表演風格視覺上嘅壓台感。而佢選擇用一支正常right-handed嘅Fender Strat 結他反轉彈亦都係一個視覺上嘅決定，一睇到就會覺得佢反叛。

至於我哋華人結他手嘅代表之一盧廣仲都非常值得討論；佢係我覺得形象定位做得最好嘅一個藝人之一。唔係賣靚仔嘅佢由出道一開始第一隻專輯就選擇咗疑似卡通片叮噹裏的大雄形象，十分親民而且冇殺傷力，甚至乎係刻意降低自己嘅身位，視覺上都可以算係兵行險著。你哋諗真啲佢第一隻專輯嘅封面上身著黃色衫、下身著藍色短褲仔重要著及膝頭嘅長白襪白鞋、加埋個冬菇頭同埋巨型圓框眼鏡，喺一般嘅情況絕對唔係會令人覺得「嘩！好型、好Charm、好吸引」，但係佢投射出來的形象同佢嘅性格同埋佢嘅音樂成件事都太有說服力，再加埋重點係佢真係好鬼有才華，竟然令到呢個其貌不揚嘅後生仔成為一代宅男嘅希望，好似代表左宅男可以唔需要靠靚仔，靠實力都可以企出嚟爭番啖氣。值得一提嘅係佢連喺揀結他方面都貫徹佢可愛嘅形象，選擇咗3/4Size嘅Baby Taylor，等佢攬住結他演出嘅時候更加可愛。

相反陳綺貞嘅形象都用咗好幾年先至建構到出嚟。佢一開始俾人包裝埋喺一堆美少女合輯《少女標本》出現，顯得一點不起眼。好彩佢作曲填詞自彈自唱嘅能力實在非常高，所以我都記得佢。後來唔知幾時開始佢成為咗一代文青女神，而佢亦都有意無意地喺服裝方面配合呢一個形象；你睇佢近幾年啲演唱會每次都主要著一襲白色長裙就知，而且為咗配合文青最喜歡嘅〈旅行的意義〉。佢亦都係每一個演唱會必然佩戴一個十分懷舊外表嘅電單車頭盔，等你將一啲有氣質嘅形容詞如遊歷、旅人、冒險、故事、女神一一變成佢嘅代名詞。

香港我地自己嘅盧凱彤亦都非常有型；自從AT17暫別樂壇決定單飛之後，一直走比較中性簡約暗黑搖滾感覺嘅造型。而佢喺個人演唱會中途當樂隊演奏Radiohead嘅名曲Creep嘅時候喺舞台上現場剃頭嗰一刻佢終於完全蛻變成功。佢雙手炸開嘅紋身同埋後來喺頒奬典禮出櫃亦非常合理。

以上舉嘅例子，有啲係刻意經營、有啲係順其自然，但無可否認嘅係佢哋嘅形象同埋佢哋嘅音樂係非常之掛鉤，有相輔相成嘅效果。

雖然人哋話：「你的樣子如何，你的日子也必如何。」

但我更加相信自信帶來的美麗。黃靖話：「你的自信如何，你的日子也必如何。」

關於黃靖：

唱作人/設計師, 曾推出3張專輯, 去過30多個城市巡迴演出, 閒時寫嘢自娛。