【毛孩與我】身在彩虹橋也希望主人快樂　Cherry：謝謝讓我學懂

愛護動物無分國界，《香港01》寵物頻道及其facebook專頁歡迎你投稿。本文由Cherry再次投稿，鼓勵失去主子的各位，不要太傷心難過，主子在彩虹橋也能感受到你的愛。

大家好，我係Cherry，我養咗好耐（由2個月大養到17歲）嘅狗狗黃寶寶，喺上年年底因腎病離開咗。時間過得好快，咁就1年啦！我從來都無忘記過黃寶寶，但係宜家我唔會再喊，我要好好生活咁畀黃寶寶睇，佢永遠都會喺我心中。

送信給移民去了汪星國的黃寶寶​

喺汪星國嘅黃寶寶，你現在如何？一切可好嗎？時間過得好快，今日係你離開我剛剛一年嘅日子，24/11/2017～我永遠都唔會忘記你離開嗰刻。之前你喺到嘅時候，我會好忙碌，每晚返來要同你清潔，餵飯，餵藥，餵食保健品，打針，比你坐輪椅，有時忙到自己飯都唔記得食，日日都好累好累。現在想起這些日子，雖然好辛苦，但好值得。

更多寵物文章：【毛孩與我】一個照顧狗狗終老故事　Cherry：唔好輕言放棄

由知道你有腎病開始嗰刻，我唔知你仲可以留低幾耐，醫生唔知，你我唔知，無人知道。我心只想盡力照顧你，能照顧你幾耐得幾耐，點都要照顧好你，我同自己講絕對唔可以畀自己有遺憾，我真係做到了。謝謝你。

教曉我永不放棄

黃寶寶謝謝你嘅堅強，永不放棄嘅精神，病發時你表現好堅強，睇醫生前一晚仲同你去影緊相同BBQ，當時你依然係表現好正常，無任何身體不適甘，但第日去醫生到抽血，醫生話你已經好嚴重，根本一啲都睇唔出。如果唔立即入院唔做任何治療，你應該剩下嘅日子唔會多。醫生話可以做嘅係吊鹽水，睇下毒素有無回落，有嘅話剩下來的就靠你自己了，沒有回落嘅話，已不用多說了......。

好彩立即入院吊鹽水，好彩毒素回落咗，之後嘅時間都係你一路堅持住。病開始時你都食得、瞓得，一切都大致正常，只係比較累同瘦咗好多。其後開始唔太肯自己食飯，要餵食餵水，行路開始不穩，腦退化了日夜顛倒，不停大叫，跌跌碰碰行不穩。直到後期完全行唔到要坐輪椅，離開前一星期要靠氧氣機呼吸，同埋已不能再自己排出大小便，全部都由我同爸爸幫手處理。

等主人回家見最後一面

直至你離開當日，我回家不到30分鐘你就離開了，彷彿你好似一直在等著我回家，一直撐住等我收工，回來見埋我最後一面。直至你在我面前，呼出最後一口氣，那個畫面真係好崩潰、好傷心、好難過，心情難以形容。我明白你離開係對你最好的，以後再冇病冇痛，現在仲可以開心咁喺汪星國同彩虹橋生活。

將愛永留在心中

黃寶寶你放心啦～你離開初時，我想起你或睇到同你同病相憐嘅狗狗我就會哭，好難過好心痛。現在想起你，我無再哭了，不是我唔難過，唔傷心，係因為已經將你放喺我心裏面，係活在我們心中。

現在去到那裡或是曾經同你到過嘅地方，我同爸爸一提起呢個地方都會好開心，會回想起同你一齊好多嘅回憶，好開心，好快樂。自你病發後，我地知道你好喜歡出街，我們帶你出多好多街，去多咗好遠嘅地方，希望能帶畀你開心快樂，和我們一個美好回憶。

更多寵物文章：【毛孩與我】當寵物踏上彩虹橋　過來人分享6件事你要準備

宜加同爸爸講起，呢度我地同黃寶寶去過……嗰次佢係呢到坐輪椅，嗰次佢係呢到小便係我身上，嗰次佢係呢到瞓著咗……現在回想起黃寶寶仲有好多好多，好溫暖，好窩心嘅畫面，黃寶寶我不會再對你傷心同難過，我會將對你嘅愛放係細佬福先生身上，會收起悲傷難過，相信你喺汪星國係會睇到，會感覺到。

你見到我快樂，相信你都一樣會快樂。黃寶寶雖然我現在不能擁抱你，不能拖住你，再帶住你遊山玩水，但我會繼續帶住你同黃菲菲嘅公仔再四圍去，旁人係唔會明白我，以為我可能係傻傻地，帶住隻公仔去不停影相，但我係唔會理人點睇㗎。

感謝你讓我學懂

哈哈哈......黃寶寶我愛你，謝謝你畀我一個學習照顧你嘅過程，令我明白好多嘢係要珍惜，活在當下。黃寶寶我現在好好，不用再擔心我同爸爸，我哋會好好照顧細佬，將愛帶畀有需要嘅人和動物，我相信直到有一天我們會在某地再相遇......

希望失去了主子既大家都要振作， 傷心難過總會有，時間會過去的。大家都要努力，加油吖。