NPV慈善人狗野外定向比賽 上屆冠軍專訪：狗狗係團隊嘅一份子！
秋天最適合帶狗狗郊遊，如果覺得行山過於沉悶，不妨帶狗狗一起參與戶外活動，例如非牟利獸醫服務協會（NPV）即將舉辦的「慈善人狗野外定向」比賽。今年是NPV第三年舉辦比賽，過往兩年都吸引了不少寵主帶同愛犬參與。《香港01》這次邀請到去年比賽冠軍Queenie Soo分享獲勝心得，供有興趣參與比賽的朋友參考。
去年，前野外定向香港代表隊成員Queenie Soo帶著一歲半的邊界牧羊犬Colly參加NPV X KAKATO 慈善人狗野外定向比賽2017，並成功奪得冠軍的寶座。Queenie接受《香港01》訪問時指出，「我好鍾意參加野外定向，我覺得野外定向就好似我生命的一部份。當我留意到NPV舉辦活動，於是帶Colly一齊報名參加。仲邀請咗細佬、細妹一齊參與。」
狗狗成為動力
Queenie當日花了43分鐘便完成比賽，贏得冠軍寶座。雖然她有豐富野外定向經驗，不過去年還是首次帶著狗狗比賽，她覺得Colly同樣是團隊的一份子，要大家互相合作才能取勝。Queenie認為Colly最大功勞是什麼呢？她說：「佢行樓梯行得好快，我本身行樓梯都好慢，不過佢會拉住我地一齊跑，帶快咗我地全隊。」
「我覺得佢好勝心都幾強，如果有人過左我地頭，佢就會加速，一定要行喺人地前面，唔鍾喺人後面。」她笑說，以前參加野外定向都以享受過程為主，甚少會那麼拼命地要向前衝。「佢就好似一個動力，帶住我哋跑快啲。」
賽前準備功夫
比賽當日，主人需要帶狗狗穿梭賽區，以最快的速度順序到訪大會預先設置好的控制點，所以體力的消耗較大。Queenie建議主人可以預先帶狗狗跑步，讓牠的身體和心理都有所準備，她表示，不同體型犬隻的體能都有差異，所以主人應視乎狗狗的狀態而繼續，切勿勉強牠們比賽。
Queenie平日經常帶Colly到郊外跑步，而且弟妹都是港隊運動員，有充足的鍛鍊，比賽時更得心應手，她分享道「我逢星期三、星期日都會帶Colly去彭福公園跑步，所以佢本身都有運動嘅習慣，而我無特別為比賽練習。」
準備充足的水
「人或者可以唔飲水，但狗絕對唔可以唔飲水，所以要定期畀水佢飲。」Queenie指狗狗不懂得用言語表達自己的想法，牠在戶外奔跑，有機會因炎熱而中暑，因此主人必須帶備充足的飲用水。「我哋基本上淨係帶咗水同狗零食。」
Queenie為何帶備狗零食呢？原來比賽途中亦設有不同的小測試，例如主人要帶狗狗繞過場地設置的雪糕筒，Queenie指出，「每隻狗鍾意嘅野都唔同，所以主人可以睇下狗仔有咩興趣，譬如有啲狗鍾意波，主人就帶個波去引佢做某啲動作。好似Colly超鍾意食嘢，我就拎住零食引佢兜過雪糕筒。」
新手必讀指南
今年的比賽場地設於大欖郊野公園麥理浩徑第九路段，比賽路線部份可能需要離開人行路進入路旁樹林內。部份參賽者可能從未接觸野外定向比賽，Queenie分享注意事項時指出：「如果係初學者，唔熟悉地方地形的話，應該盡量避免行捷徑，例如走入叢林，應該選擇行大路（例如行山徑），會較安全同快捷。」
她更叮囑主人要為狗狗繫上拖繩，「就算狗狗好聽話，全程都一定要拖繩。因為狗狗可能未必上慣山，有機會係唔熟悉嘅地方周圍走。尤其係今年比賽喺牛寮，賽區有好多空曠嘅樹林，萬一狗狗入咗樹林，搵唔返就大件事。」
▼▼▼▼▼更多上年比賽花絮，可以按下圖收看▼▼▼▼▼
NPV X Kakato 第三屆香港慈善人狗野外定向2018
日期：二零一八年十二月九日（星期日）
時間：早上十時至下午四時半
地點：大欖牛寮（扶輪公園）
報名截止日期：2018年11月20日晚上23:59