流浪狗狗慘遭退回　義工：試養人話狗狗唔夠活潑好動…

流浪唐狗Mia於本年6月中獲試養家庭試養，狗狗本以為可以從此脫離落泊的生活。豈料兩個月後領養者向暫托家庭表示希望可以退養，理由竟是領養人認為狗狗性格不夠活潑好動。Mia現正再次處於落泊的處境，暫托家庭義工Irene表示一定不會放棄狗狗，並希望可以盡快為牠找到一個真正屬於牠的家，從此真正快樂地生活。

相關文章：港媽帶狗入電梯被怕狗港女喝令「出去」　網民：一人讓一步吧

義工Irene接受《香港01》訪問時表示：「4歲的Mia本來係一隻在山上流浪嘅狗狗，佢偶然之下遇上一位狗義工帶佢去絕育。呢位狗義工請咗位獸醫為Mia絕育之後，本來想將佢放返山上邊嘅，但後來發現狗狗本身住嘅山頭滿佈咗由「漁記」（漁農自然護理署）所設置嘅狗籠，當我知道狗狗遇到咁嘅情況，我就同嗰位狗義工希望接佢返屋企，為狗狗搵到一個好歸宿。」

相關文章：主人搬屋將懷孕母狗棄於門外 義工：怎可以將家人棄之不顧

後來該位狗義工同意由Irene代為照顧Mia的生活，「初時其實有帶Mia去狗場住過一排嘅，但一嚟間狗場要收錢啦，二嚟我覺得佢哋對狗狗好差，成日都困籠，呢個情況其實都持續咗九個月，我最後真係唔忍心見到佢咁樣生活，所以我接咗佢返屋企同我一齊住。」Irene說道。

相關文章：警犬堅持再累都只站著睡 網民心疼：謝謝你一直以來的守護

Irene接了Mia回家生活一段時間後終於收到一位女士的致電，告訴她希望試養狗狗，「本以為Mia終於守得雲開見月明，終於搵到一個新嘅家庭，但點知兩個月之後，嗰位女士打返畀我話要退養，原因竟然係因為佢認為Mia唔夠活潑，氹唔到佢開心。」Irene淡然地道。之後她又補充：「其實又唔可以怪晒嗰位女士嘅，但如果初初佢話佢想要一隻活潑好動嘅狗狗，我一定唔會建議佢養Mia，畢竟Mia嘅性格真係好文靜，從來我都無聽過佢吠咁制。」

「我一定唔會放棄佢！初初由執佢返嚟到到宜家建立咗信任，我一定會幫佢搵到住好人家，無人養佢嘅話，我養！」－Irene

現時Mia已重回Irene的家中繼續暫托，等待新家庭的來臨。當記者問到若然無人願意領養Mia的話，Irene打算怎樣辦？Irene立即打斷記者的問題並說道：「我一定唔會放棄佢！初初由執佢返嚟到宜家建立咗信任，我一定會幫佢搵到住好人家，無人養佢嘅話，我養！」；Irene又表示若然有《香港01》讀者有興趣領養Mia可以隨時聯絡她。（Facebook：Irene Lau）

後記：記者於晚上六時許與Irene完成訪問後，正想執筆撰寫報導之時，Irene於九時多又突然向記者發了一個短訊，並希望有興趣領養Mia的有心人本身是一位愛狗以及有養狗的人士。記者與Irene溝通的過程中可以完全感受到，她是一位愛犬深切的女士，只是希望為狗狗Mia找到一個愛錫、珍惜及永遠的家。