觀塘老舖自成「貓閣」15年 愛心老闆：流浪貓才是弱勢社群！
不少老舖都會養一兩隻貓來看看門口，閒時可捉下老鼠，還是以實際用途為主。但今時今日，「舖貓」漸漸被「寵物化」，隻隻食好住好，涼冷氣、嘆世界，統統都變了舖內的小皇帝，但正正有這班小皇帝坐陣，才顯得香港的舖頭有「人情味」！
觀塘「興記木行」在這區已經營超過30年，與鄰舖、街坊混熟得就像親人。而談到「興記」，周邊的人除了木材之外就會聯想起「貓」和簡小姐。你又怎會估得到硬生生的木材舖背後，竟暗藏一個充滿「人情味」流浪貓小天地、安樂窩！
觀塘區雖然正進行大型重建，但仍有不少唐樓、舊舖、小店未被清拆，周圍依然保留著舊區特色。尤其是傳統的雜貨店、藥材鋪、文具鋪，甚至書店，都會養貓，因為貓在當年都很命賤，隨街都能撿得到，能成功入舖的當然很夠運，但只有少數。簡小姐建造這個貓咪小天地，其實想為這一班「弱勢社群」出點心。簡小姐笑言：「而家叫做好啲，十幾年前嘅貓周街都見到，冇人理。我哋老咗、病咗，或者傷殘，都有政府叫做幫吓手，但呢班街貓就係冇人幫㗎，佢哋先係社會嘅弱勢。」
更多寵物文章：【忌廉哥出沒注意！】忌廉哥貓罐頭 周六樂富一小時義賣籌款
默默守護街貓十多年
簡小姐是木行的負責人，性格低調內向，絕不喜歡出風頭。記者「跪求」多次才肯接受訪問，但條件是「拒絕上鏡」！而木行是家族生意，在這區經營超過30年，上班下班簡小姐幾乎每天都會發現幼貓被遺棄，生命危在旦夕，建構這個只屬於貓和簡小姐的小天地，就是在那時開始。簡小姐：「由油牆、鋪地板、買貓具、佈置等等，全部都係我一手一腳，舊區街貓命賤，冇人理咪等死，冇人理咪我理，點知一玩玩咗我十幾年。」
「我覺得我做嘅事其實冇乜特別！」說出來有點輕描淡寫，但有誰人能夠堅持信念十幾年？十多年來，住港島區的簡小姐每天零晨四點起床，港鐵都未有仍然要搭N車（通宵巴士）返舖頭。簡小姐：「鏟屎、餵糧餵藥，跟住就要正式開工，放工再幫啲貓搞一輪先走。我從來唔覺得係興趣，我亦唔想當係興趣，我只係唔忍心見到啲貓咁命賤，有得揀，我都想瞓多兩個鐘。」
寧願少一點娛樂
舊區四處不斷有重建項目進行，受影響除了居民，就是鄰近的小商戶。生意淡薄，還要應對人工、舖租已經困難重重，而相比其他人，簡小姐還多肩負救貓重任，跟記者粗略計算過，流浪貓的日常開支，貓糧、貓砂，水電等等，每個月至少兩萬港幣，其實相當吃力。簡小姐：「而家周圍都生意淡，每個月兩萬都幾重皮，仲未計醫葯，但均爭啲講，又唔係個個月都需要睇醫生，雖然留得喺我呢度個個都係老弱殘兵。唯有自己少啲娛樂，食少啲！」
更多寵愛故事：
【緬因貓】日日勤梳毛 甘心鏟大屎 主廚愛大貓：就是要體諒！
【帶貓入境香港】虎貓保加利亞邂逅港夫妻 移民至港誕「虎二代」
領養講包裝 「甩皮甩骨」難成功
在閣樓內，現時大概有十多隻流浪貓，有部份已經成功透過義工尋找家庭，而全都是簡小姐在街撿獲，又或是朋友帶來。但最令記者傻眼，當中不乏名種貓，相信都是身體有毛病而遭棄養。其實每次接收到流浪貓或遭人棄養的貓，簡小姐都會為牠們盡力治理好身體毛病，再做絕育，然後就會聯絡外間的社工組織，務求盡快將貓「散貨」。簡小姐：「喺出邊有人錫總好過喺我舖頭，要人肯揀都要執靚啲先，但呢幾隻似名種貓就例外，特別多病痛，當然有問題先會畀人遺棄，有啲係健康問題、有啲係性格問題，其他靚嘅貓我都會拎去被人領養。」
簡小姐的「貓閣」雖然沒有規模沒有系統，就是見一隻救一隻！但十多年來的堅持，令簡小姐遇上不同界別又志同道合的人，擴闊了拯救流浪貓的圈子。欣賞的人會叫她「愛心暴棚」、「貓癡」，斯文一點則會稱她簡小姐，不過簡小姐笑言，有多街坊仍然覺得她的行為走火入魔，直呼「傻婆」。但小編認為，偏偏就是這份傻氣，一班街貓才不至於流浪街頭，始終「傻人會有傻福」的。