【處女黨解散】苟芸慧拖陸漢洋做訪問　帶訂情鑽戒暗示就封盤？

因為信奉基督教的關係，李亞男、鍾嘉欣、王君馨、岑麗香和苟芸慧一直堅拒婚前性行為，被外界封為「處女黨」，不過近幾年嫁下又一個、嫁下又一個，處女黨開始面臨解散，去年年尾王君馨也宣布婚期，亦即是黨員就只剩下苟芸慧（苟姑娘）一個。

但今年之後大家唔使再為苟姑娘擔心喇！因為現年33歲的苟姑娘終於拖着緋聞男友陸漢洋接受雜誌訪問，兩人已經傳出戀情好一段時間，陸漢洋更多次大方承認正在力追苟姑娘，在5月20日在社交網站公然放閃寫上：「52099」（我愛你苟苟）。

而在雜誌訪問期間，兩人更帶住訂情鑽戒接受訪問，據知戒子上的兩粒鑽石乃陸漢洋媽媽臨終前送給他的遺物，雖然兩人未講婚期，但今次帶住做訪問顯然是喜事近的徵兆。

兩人更表示公開戀情的目的是為了今後可以做「一般人拍拖做嘅事」，即係拖住手仔行街、食飯、睇戲咁，真係好Sweet啊！苟姑娘更笑言其實自己不難追求，但有勇氣踏出一步的就不多，兜個圈大讚陸漢洋有勇氣和自信。

睇嚟，等王君馨同苟姑娘都嫁人後，「處女黨」就可以改名做「婦女黨」喇。