港姐絕密面試相有得睇 黑皮膚黃心穎：我咁嘅樣都可以選港姐！
「一年容易又港姐」，話咁快《2017年香港小姐競選》又有公開招募，記得上年好大堆頭，香港小姐同香港先生一齊搞，至於今年仲有冇香港先生？TVB相關方面初步回應就話未知，有詳情再對外公布，唯一肯定的就是港姐總決賽將會在8月上旬舉行，今日就請來歷屆及應屆港姐出席記招，講下參選的心路歷程。
齋講心路歷程就好悶，所以今次記者會充滿彩蛋，多位港姐都有齊心理準備，在眾目睽睽之下回望自己當年參選提交的照片，來個Before and After。多張對比照片當中，變化最大的就是黃心穎與陳凱琳，她們還是少女的時候，擁有一身黝黑的皮膚，「黑色肌膚給她的意義」，用這幾張照片參選，想不到就是一撃即中，有得interview，最後仲當選做埋港姐。
↓放大可看更多歷屆港姐參選圖↓
之前被人話同阿Bob的工人姐姐好似樣的黃心穎，可能都講到慣晒，超級大方與18歲及20歲的自己「合照」，她說：「都冇咩好尷尬啊，呢個都係我自己嚟，同埋公司叫得我交呢兩張相，我都冇咩所謂。同埋都係想話畀大家知，我咁嘅樣都可以參加港姐，所以都唔使怕羞，畀啲自信畀自己。」心穎BB當年與現在最大分別，就是箍了牙，還有皮膚白了很多，她笑言：「以前細個好鐘意曬到自己好黑好黑，到要參選就覺得，唔得啦喎，一定要白返先得，加上我係白底，所以我就唔去曬太陽。」心穎BB白得如此快，最大功勞就是怒搽防曬：「任何時候都係搽防曬，同埋而家出街都拎齊三寶：遮、防曬、風扇，冇咗佢真係唔掂。」如果真係想白啲嘅話，心穎BB就建議大家可以試試飲檸檬水，增加維他命C，對皮膚都好一點。
至於有「敢言港姐」之稱的千雪BB，見回剛參選的自己，她就表示不尷尬：「個感覺好似見返拍劇咁，有個年輕版嘅自己，兩張相就係年輕版嘅朱千雪，其實見返都係好有回憶。嗰兩張係我啱啱大學畢業同朋友一齊玩自己影，諗返起當年就好開心，又好無知，而家就成熟咗，經驗多咗，其實我好鐘意而家自己。」5年後的朱千雪就話領略到人生有甚麼最重要：「以前一畢完業就會盡快搵嘢做，以後都唔洗再讀書，但慢慢就發覺人生仲有好多嘢更加重要，例如家人、工作同健康呀，呢啲唔會take it for granted。加上係TVB呢幾年，就發覺以前細個諗嘢都幾Narrow，所以就要增值下。」唔怪得之千雪BB而家咁好學啦！