武神李嘉向徐曉冬下戰書　2分鐘解決囂張王：佢一啲都唔好打！

李嘉亦表示如果和徐曉冬決鬥，亦好有信心，他說：「 信心絕對有，其實我尋日喺fb都寫咗一篇文，呢個都算係我對佢嘅一封挑戰書，如果佢肯跟住我規則打嘅，我唔駛你包我機票、住宿、或者咩120萬獎金，錢我唔係冇，嗰啲10分鐘call哂傳媒嚟，大肆宣傳呀、有埋獎金，呢啲唔係武術家嘅挑戰，真正嘅挑戰係唔會有聲有色，佢唔接受嘅話，佢只不過做緊一場MMA嘅騷，如果兩個人嘅恩怨，攞嚟當騷咁做，同鬥雞鬥狗有咩分別，佢只不過喺度炒人氣，如果我真係同佢打，我係唔會留手，大家冇得留手，好似佢咁樣「中」嗰條友幾拳，都只係擦損嗰額頭，我同佢打，如果我㩒住你個頭，我真係當你榴槤、椰子咁打（李嘉試過一拳打爆榴槤）。」

李嘉還表示徐曉冬可以在三年內隨時找他，他說，「你可以三年之內隨時搵我解決，我又可以，咁先打得爽。我約戰規例都寫明，除咗徒手拳腳之外，當時身邊你用得嘅「架餐」都可以用，當然我都可以用啦，因為功夫就係生死嘅事！（用幾耐時間解決佢？）應該係兩分鐘之內，一係佢解決我、一係我解決佢，冇可能同佢打一個round，我練咁多嘢，都係隨時stand by，我打人或者人打我啫，中國功夫攞嚟強身健體係浪漫廢話，功夫從來都係「冧」友，或者防止俾人「冧」，我都想傳媒寫呢件事，中國功夫係咪佢所講咁不濟呢？我覺得真係唔係！」

李嘉講明如果同徐師傅打就唔會留手，亦唔怕對方致佢死地，原來這幾年李嘉每天都視死如歸，他說：「我有一段文刪咗、冇講過出嚟，近呢5、6年，除咗拍嘢之外，我都係著黑衫黑褲㗎，唔係因為要型，係想話俾人聽，我係隨時接受挑戰，如果我打死咗你，我呢套黑衫黑褲就係即時送你殯嘅禮服，我輸咗呢套衫亦係送自己一程。練功夫嘅人，係有呢個覺悟，你問佢有無啦。」嘩！大家應該feel到李嘉的決心啦……


 

李嘉除了不滿徐曉冬侮辱中國武術、更覺得他沒有資格批評李小龍，他說：「佢話李小龍唔係格鬥高手，簡直痴人說夢，第一你冇同李小龍面對面接觸過，你唔係佢嗰個年代出世，你有咩資格講一個先人？第二，李小龍做到嘅嘢，你做唔做呀？李小龍一隻手指可以隊爆一個汽水罐，你（徐曉冬）得唔得呀？如果李小龍做到嘅嘢，你都做唔到，你憑咩話佢唔打得？」正所謂拳腳無眼，如果李嘉同徐曉東冬真係打起上嚟，希望是點到即止啦，始終邊個受傷都唔好，其實椰子、石磚、石春都幾硬㗎，李嘉都打得爛.......佢拳力有幾多？真係不敢想像。