【全職沒女】姚瑩瑩由力捧變消失　捱足21年：無工開主動搵監製

《全職沒女》有陳松伶回巢演出，飾演嫁不出的沒女，多年無拍無綫劇，松松姐姐依然保持水準。但最令網友有驚喜的，反而是劇中飾演松松家姐的姚瑩瑩，劇中男人婆造型，經常咬著牙籤，說話粗聲粗氣，和以往飾演的女人味濃角色好大分別，而且為了這個角色，瑩瑩幾乎素顏上陣，她接受《香港01》訪問時說：「我初頭都唔知自己做唔做到！我仲問監製are you serious？我不嬲做開啲角色都好女性化，突然間要做一個直頭係麻甩佬咁嘅角色，我都唔知得唔得。但監製Andy（陳耀全）好信任我，叫我放膽演，我亦都放盡咁做，我除咗畫粗條眉，幾乎冇化妝，我連唇膏都冇搽，因為一搽咗就變女人，好彩我本身咀唇深色，講嘢就大聲啲啦，我又成日留意啲Crew係點，一個好麻甩佬嘅男人係點呢？有時我不自覺女人咗，班Crew會提我，『喂，瑩瑩又變返女人喇！』」

 

姚瑩瑩在《全職沒女》是出色綠葉，但其實她曾經是上位花旦，她是1991年新加坡小姐冠軍，之後參加環球小姐，選美期間和當年香港代表袁詠儀同房，二人亦成為朋友，之後袁詠儀更介紹她到無綫發展，姚瑩瑩在無綫第一個工作是主持星期日早上節目《文化廣場》，之後碰巧當時監製戚其義想找新面孔拍《O記實錄II》，令姚瑩瑩開始拍劇，更被無綫捧為當年五美之一（曹眾、陳彥行、姚瑩瑩、傅明憲、彭子晴），當時在不少重頭劇都見到姚瑩瑩，對手戲多數是劇中的當紅小生，例如《天地豪情》飾演的Apple和羅嘉良有不少對手戲。

酒店門口等人教講對白

當然最多人記得她在《尋秦記》飾演的朱姬。劇中的她和古天樂、郭峰、林峯、江華都有不少感情戲，當時有傳因為翁虹和古天樂不咬弘，最後古仔力薦姚瑩瑩這位好朋友演出，不過她說：「我記得有日我好似返咗廠（清水灣舊址）拍緊《七姊妹》，啲梳頭化妝話某某高層揾緊我呀，然後嗰個高層拉埋一邊問我：『阿女，我想妳幫我做《尋秦記》』我記得我望住佢，問咩嚟㗎？嗰陣我連清裝、民初裝、古裝都分唔清，秦始皇係咩年代都唔知，跟住同我講做林峯嗰阿媽，我仲問我生到佢咩?佢話：『妳係我第三個option，第一、二個reject咗我，妳點？』我話如果你覺得我做到，我就接啦。」

姚瑩瑩絕對是老闆眼中的好員工，獲派什麼工作就全力做，她在劇中要說文言文、一個連廣東話都未講得正的人，其實很大挑戰，姚瑩瑩為了演好這個角色，讀好每一句對白，在內地拍攝《尋秦記》期間，每天在酒店門口等劇組回來，等人教她講對白，她說：「初時外景未有我戲份，但我已經上咗去，我就日日揸住啲劇本，大約下午5、6點我就喺門口等佢哋，一見到導演返嚟，我就問佢可唔可以同我對下劇本呀？但導演就話我都未排，未拍到，點同你對呢？當時梁家樹(戲劇總監)宣萱、見到我都笑，問妳個儍妹喺到做咩呀？都未到妳拍，我同佢哋講我攪唔掂，我都唔知自己講緊乜！我仲問啲助導點講，我買埋錄音筆，叫助導讀一次，尤其嗰啲8至10個字嘅文言文，之後返酒店房練習。」

自《尋秦記》走下坡

那時姚瑩瑩已是第二女主角，當時大家都以為她會成為另一個當家花旦，但突然間姚瑩瑩工作忽然銳減，角色亦越來越淡，但到現在她都不知道原因，她說:「我真係唔知，有時啲人話我可能《尋秦記》做得差，啲對白講得唔好，我唔知，有時啲幕後同我傾偈，話我《尋秦記》唔應該接，可能事業會好啲，但我會咁諗，每個人都要經歷人生上落，有嘢做我就覺得OK喇，如果嗰刻唔拍，我都唔知我會拍咩？或者我一早喺呢行消失呢？冇人知。」在無綫超過20年，姚瑩瑩直言有幾年感到傍惶，更想過轉行，她說：「有幾年可能公司想用一啲新人呀，或者其他政策，令我機會少咗，我有諗過放棄，我仲適唔適合呢行呢？轉行又唔知轉咩？我同另一位女演員有傾過，我哋做咩工好？打字又唔夠人快，我又驚去見工啲人以為我偷拍！哈哈。」

自《尋秦記》後，姚瑩瑩漸漸消失在力捧之列，由高層欽點工作，到變成要自己打電話給監製找演出機會，她說：「我有時聽到啲人話自己唔夠騷，佢哋話成9個月冇開工，我會問咁耐冇工開，你仲唔郁？自己唔揾機會？冇嘢做就自己揾啦！機會唔係等，人哋唔俾就要自己揾，我自己兩個月無嘢做都驚啦，嘩！死啦，點追返條數呀？

「（有冇唔開心？）有，嗰陣冇嘢做，都會有時自己特登返去公司，問下人邊個監製開劇呀?如果熟嘅，咪試下主動問下囉，有冇預我呀？有冇角色啱我呀？我兩個月冇嘢做喇，我又驚under騷，我當然熟先問，唔係個個都問嘅，我好多謝阿Lam(監製林志華)，監製關永忠、監製張乾文，佢哋幾乎有劇開都預我，做我哋呢行，尤其呢個位，有機會就要做，有啲知我爭騷，都會好幫我，得，我幫妳，但個角色冇咩做喎，但有好多騷，我都做，因為我要還騷㗎，當然佢哋都知有挑戰嘅角色我好想做，但有時冇都無計，好似添哥，佢揾秘書打俾我，嗰陣拍《義海豪情》，佢話：『瑩瑩，添哥有個角色想揾妳呀，騷就好多，但戲就一般，妳介唔介意？』我話我多謝都嚟唔切，人哋幫你仲嫌角色冇發揮？想死咩？機會有時就係做下仲有，人哋喺電視城撞到你，咁又可能醒起要揾妳喎，咁咪有機會囉，係到等，係到怨冇用㗎，雖然有人話我係一隻白痴嘅牛喺到耕田，前面有冇草呀？又冇理周圍啲人？我覺得理咁多嘢，我會唔開心，揾機會做好自己就算喇，其他嘢唔好理。」