翟威廉在日本係型男代表　同日本妹拍過拖：學好日文先！

翟威廉(William)最廣為人知的當然是2010年勝出香港先生並且成為八料冠軍，不過在香港先生名銜的背後原來他都十分國際化。曾經在日本和韓國留過學的他，精通日語亦可以用韓語溝通，更鮮為人知的是他曾經在日本出道做過藝人！

18歲還在日本留學的時候，便成為了搞笑組合「イケメン劇団」的其中一員，在接受《香港01》訪問時亦驚爆曾經想在日本演藝圈長期發展，那麼為何後來又回流香港呢？他說：「喺日本發展條路好濛糊，因為你始終係外國人，就好似喺香港有呀一哥（布偉傑）等等嘅外國人，佢地雖然好特別，但係嗰個發展方向係少啲。可能都會出某幾個位，但做藝人應該要有好多嘢要表現出嚟，但喺日本講日語已經係一個問題，講得再好再流利都無用，因為口音唔正呀嘛。變咗mc job做唔到喇，做戲又限死咗一啲角色，變咗就無乜job接，只可以走搞笑路線。」

在日本留學，有日本女朋友是常識吧？William當然也不例外，曾經有一個拍了五年拖的日本女朋友。咁如果想追個日本女朋友，有咩方法呢？William劈頭就說：「學好咗日文先，一定要學，啲人話要溝條女嚟學語言其實係唔work，你一定要學好咗語文先，如果唔係啲關係就無辦法維持到。之後就要包容嘅心喇，同埋日本呢個民族比較講規矩，所以要好清楚日本人嘅文化，例如見到啲咩人要以啲咩形式打招呼。就算日文唔好，但係你個行動要表現出跟到佢地嗰套，但絕對有難度架跟足佢地成套處事待人嘅方式，因為始終同香港人唔同。例如打招呼呀，講嘢次序呀，邊個位可以插口呀，呢啲好多好細微嘅嘢都要慢慢去掌握。」William說他在日本沒有夜生活，是乖乖仔，還說在28歲之前不會出夜街玩，現在都會跟朋友出去飲酒出街。他說笑現在單身可以跟朋友出去蒲吓，不過暫時都沒有時間。

除了追日本仔女，William對在日本投資買樓都有點心得，因為屋企曾經都在日本買樓收租作投資。雖然現在已經全都賣掉，不過經常幫屋企人處理日本事務的他就有幾個建議俾想在日本投資買樓的朋友。首先不要先看回報率有幾高，應該先留意樓宇的樓齡，因為日本一些樓齡較高，當時未有防震法例，所以防震會較差，這些樓甚至已經沒有人要，如果看到平就隨便買就好易中招。地區也很重要，William就推介東京的西部，地質會較好，例如涉谷區、杉並區、新宿區等等。而且在日本買樓你不能向銀行借錢，變相就是要一炮過買，那麼就要承擔日元的風險。買樓收租要有當地戶口，因為外國人不能有日本戶口，你買來自住還好，收租的話就沒有戶口收錢。所以要跟當地的地產商或中介商協調一下，當商討的時候最重要就是日文，原來講到尾投資和追女仔最重要都係日本，有興趣在日本發展的朋友快點加速學日文吧。