女搬運工人爆肌拉貨瘋傳　沙律激讚：女仔有肌肉係一種美！

高手永遠在民間，力大無窮的又點止男士，今日網上瘋傳一位女搬運工人，身穿背心短褲爬山boot，在馬路上用「唧」車拖貨，貨量層層叠幾乎高過人。有資深運輸人士指，「唧」車加上卡板再加貨物，目測至少250kg，加上在馬路上車來車往，就算男仕要拖拉、轉向都不是易事，不過這位大力到似神奇女俠的女搬運工人，仍然拉得「郁」，而且大腿及「老鼠仔」線條盡現，非常之有霸氣。而有心水清網民記得，其實這位女搬運工人早前曾經出現，有網民亦報料指她是超市的拆貨工人，經常在香港仔現身。和她共事的男同事亦見怪不怪，亦有人指她的男友亦是做運輸，二人經常情侶檔上陣。

而一向鍾情健身的宅男女神沙律（張沛樂），亦覺得她很美，她說：「我真係覺得佢好犀利，好少女仔去做呢啲男性勞力嘅工作，佢都好大隻，好有肌肉，証明呢個世界上好多嘢唔係剩係男性先做到，女性都可以做到，女仔有肌肉都係一種美。」