【八時入席】時生楊瑞麟唔襟撈　失做金牌司儀機會：我冇咩企圖心

 54歲楊瑞麟在《八時入席》飾演電視台總裁時生，劇中長䄂善舞，機關算盡，但現實中的他剛好相反，連一個高層都不認識，亦曾試過有上位機會不懂把握，25歲的楊瑞麟在1987年參加《全能司儀大賽》之後入行，坐穩一綫司儀之列，當時何守信離巢、又發生鍾保羅事件，無綫想推楊瑞麟做金牌司儀，事隔多年，楊瑞麟亦承認真有其事，他說:「當時有傳聞金牌司儀要揾接班人，確實有高層揾過我去傾，當時我做緊《香港早晨》三日同《歡樂今宵》一晚，佢哋就叫我《香港早晨》照做，《歡樂今宵》就加到三晚，如果有大騷又要照做，點解當時話我好似推公司呢？因為佢叫我加長少少約，但我出面又有其他工作，咁啱又應承咗人，我又唔想做唔到承諾，我唔記得咗，當時點講，大約係我話諗諗先啦，份約係咪可以唔加長呀?人工係咪可以調整好啲？應該係呢個部份有啲達唔到共識。」

楊瑞麟續表示：「如果當時公司唔同我傾任何嘢，就咁安排工作俾我，聽日返多晚，做多日啦，我做咗㗎喇，我從來都係有工作俾我就做，冇就唔會話搲，突然叫我上去傾，我就唔係好識點做，好記得上完去傾，隔咗大約兩星期左右，公司打俾我，叫我照做住《香港早晨》先啦，我當時答好呀，唔該，對話就咁完結，亦結束咗之前所講嘅嘢喇，事後我同一位好熟嘅幕後同事傾，佢話你失咗個好大好大嘅機會，亦有人話我咁嘅性格死得啦，但呢個係事實，我係冇咩企圖心，我性格係咁，望返轉頭，工作機會係損失，但我生活都幾好呀？當時因為我出面有其他生意，我物質追求唔大，我冇後悔，不過人生有時就係做錯好多決定，但又諗返，當日你做啱決定又係咪一定紅呢？」