【逆緣】黎耀祥做風水佬呃你十年八年　嫌自己未夠奸：可以再盡啲

古語有云：「有黎耀祥嘅地方就會有強烈嘅戲味。」所以一班電視精都好想睇呢位三屆視帝嘅演出，但等咗一年有多都仲未可以喺電視機度睇到佢嘅新劇。不過大家唔使等好耐喇，因為下個月二號佢做主角嘅無綫新劇《逆緣》就會首播，而且佢仲喺劇中飾演一個貪錢奸仔風水師。

諗返起祥仔對上一次演奸角已經係6年前播嘅《盛世仁傑》角色武承嗣，但佢今日就喺記者會話唔會因為中間十幾次拍劇都係做忠，而令自己嘅奸味生疏：「我好鍾意做奸架，我仲覺得個角色未夠奸添，最後都仲係有啲良心發現咁，所以可以演得再盡啲！」

至於現實有冇做過啲做完會後悔嘅奸嘢？祥仔就話自己份人就好小心謹慎嘅，做咩都諗過度過：「可能我係細仔，好早就學識點樣睇爸爸媽媽哥哥姊姊嘅眉頭眼額。」但同好兄弟曹永廉、蕭正楠等玩就會比較喪啲：「你窒我我窒你咁。（會窒到人哋堅嬲？）嗰一下囉，但隔幾秒再氹下就冇嘢。」

至於仔仔黎正僑有冇試過做蠱惑嘢激到佢紮紮跳？祥仔就話自己睇得好開，甚至用「放養」嚟形容自己點教仔：「因為條命係佢自己負責返，我成日都同佢咁講，佢做衰嘢都唔關我事，我對得佢幾多年，咪得返十幾廿年，佢依家喺美國讀書做咩都冇所謂，但其實佢都好識諗，因為大家都係真心對大家好。」佢又笑指仔仔復活節會回港過節，因為美國讀書好悶。