【果欄中的江湖大嫂．專訪】楊明被罰重讀訓練班：慘到想死

「擺你入雪櫃都好似便宜咗你，掟你入去訓練班折磨下，直到完成成個訓練班後，諗深一層其實係公司係再一次俾機會你。」，今年台慶頒獎禮中奪得「飛躍進步男藝員」獎項的楊明說道。
1999年透過訓練班入行的他，一出道已備受公司力捧，可惜年少氣盛，試過醉酒駕駛及刑事毀壞，搞到公司不得不停止他的合約，在他出道第8年的時候勒令他重讀訓練班，當他回想起那段連續3個月每天朝九晚六返電視城上堂的時光，直言辛苦過拍戲。
攝影：陳順禎
場地：重慶劉一手火鍋

外型高大靚仔的楊明在初出道時原本TVB是打算力捧擔當小生，外人一睇都知星途平步青雲，他透露當年的路真的很容易行，「啲機會係勁多咁嚟，覺得唔係一回事，可能嚟得太易就唔會珍惜。自己都花好多時間去醒返。嗰陣飾演的角色嚟嚟去去都係做二世祖做幾年，當時感覺好失意就犯錯，犯錯又失意，重覆係咁拖低自己嘅能量，直到去讀第二次訓練班個陣先知真係要醒。」

相關文章：

【果欄中的江湖大嫂．專訪】楊明5年前臨門被悔婚：係timing問題

在網上搜尋楊明的資料，除了搵到之前闖的禍，還有一件事令人十分意外，就是他是史上重讀訓練班第一人，他笑言返學第一個星期超級悶，「我心諗點呀！參觀電視城又自我介紹，嗰陣已經出咗道8年，無端端要朝九晚六，感覺係好辛苦直頭想死咁。仲要見到啲新同學咩都問，係咪豬嚟架?佢地個個入黎好似遊客咁，頭一個星期完全格格不入，坐係班房間最角落個位，收埋自己。」笑言自己是TVB『老seafood 』的他，坦言當時心理關口未過，「個陣我已經20幾歲，其實大佢地少少，突然之間要同班𡃁仔係度遊玩，去到第二個禮拜開始慢慢投入返。」睇返當年的同學，原來有張穎康、馬貫東及樂瞳。楊明其後笑言估唔到當年他們以「遊客」身份加入TVB，但現在已經是獨當一面的演員。

重讀訓練班時他遇上從事戲劇事業超過50年的麥秋做導師，他坦言當時是他最開心的時候，「可以跟佢學啲舞臺劇嘅知識，而我有個優點就係，公司做咗8年，知道自己要啲咩嘢，會係麥秋老師同其他老師拎到啲咩嘢。」問到麥秋老師知唔知他是重讀生？楊明就笑言，「緊係知喇，簡直係要重點睇住我，睇下我有無偷懶，唔留心上堂。」直到舉行畢業禮時，楊明在班中就好像擔任「班長」一角，負責帶領著成班同學在TVB全部監製面前完成畢業作品，「因為我之前做過都算係有啲經驗，就會知道大家擔心啲咩。」

自從第二次入讀訓練班後，令他比以前更珍惜，「其實當時闖咁多禍，公司係可以炒咗我。但佢地無，好多謝樂小姐同珍姐，回望公司好多師兄弟都好努力，做十幾廿年都係等一個機會。以前嘅我係係浪費人地嘅機會，每一次機會都有權係第二個人，一年有咁多個角色，點解要用你呢？好多前輩都同我講，『你要比之前更努力，因為如果你嘅事發生係我地身上，一做就玩完。 』」楊明表示好慶幸自己在出道頭10年有這樣的經歷，「之前啲事對我日後呢幾10年人生好大嘅經歷，做就咗日後嘅楊明。如果無呢啲事一路都好順利，相信今日見到嘅，一定唔係而家你見到嘅楊明。」