Aka去婚禮又著白色Lace搶鏡？ 醒目女急澄清：P.S. 我著緊肉色衫
撰文：李妍樺
出版：更新：
早前林奕匡同老婆Rikko喺香港補辦婚禮，請咗一班圈內好友去飲，連伴郎同伴娘都係明星，可謂星光熠熠。本身件事就好Sweet，但事後就出現咗段小插曲，事源阿Phil本身就同Super Girls嘅Aka本身係Friend底，之後仲因為同樣都係容祖兒粉絲，被邀請做《麻煩你》同《最好時光》MV嘅主角，當日Aka當然有份去飲，仲喺IG打卡，咁就出事鳥。可能因為佢同阿Phil熟，喺張相入面佢唔止企中間，仲同阿Phil貼一貼咁，加上又著咗白色衫，網民就話唔講仲以為Aka先係女主角。
網民個個鍵盤戰士上身，口誅筆伐，嚇到Aka即刻出文道歉，仲親自打電話畀Rikko同佢Say sorry，承諾以後會婚禮會多留意自己衣著。
但……人類總要重複同樣的錯誤，尋日（14/3）Super Girls嘅化妝師結婚，五女難得合體濟濟一堂，咦，Aka你又著白色Lace衫，上次嘅教訓仲唔夠深刻咩？咪住，大家唔好跟車太貼，呢年唔係白色嚟架，Aka自己喺文末都利申：「恭喜Kingking，祝永遠幸福快樂💕，P.S. 我著緊肉色衫」同埋Aka都特登企到遠一遠，大家就放過佢啦。