【果欄中的江湖大嫂】37歲甄詠珊演惡死醜婦喊打喊殺：唔想做花瓶

無綫《果欄中的江湖大嫂》裡面除了靚靚的陳煒、岑麗香，不少網友都留意到粗魯女人「惡人菊」的表現，但完全認不到這位演員是誰，要出動維基百科先知佢係邊個，知道答案後又覺得好驚喜咁。未Check？唔緊要，我開估，佢就係曾經同石詠莉、陳樂榣組成女子組合Freeze的甄詠珊。

提到甄詠珊在戲中披頭散髮，皮膚勁黑之餘塊面又勁多斑，名乎其實是個醜婦，本身靚靚女女的她承認曾難過心理關口：「佢哋話我唔化妝個樣未夠老，所以要化老少少，同埋喺果欄做嘢，冇可能乾乾淨淨，但其實真係好想接呢種角色，因為好突破同可以發揮。不過，我收工著返斯文衫時，發覺個妝同件衫唔係好夾，嗰刻真係過唔到自己。」講到戲中她經常惡死地大聲嗌，她笑指不擔心會失聲：「唔驚得咁多！為咗講嘢大聲啲，我都有咬住個木塞，學擘大啲個口講嘢。」

睇一睇佢尋晚嘅表現：

問化妝最花時間是邊個部分？甄詠珊坦言條眉有啲難搞：「要搽到好深色之餘，仲要有好多雜毛，所以我自己都留咗好多，真真假假咁，其實啲斑都係化上去。嗰三個月個人真係粗魯咗，好彩完咗之後都跳到出嚟，仲係好鍾意著裙。（之前扮醜都好易彈出。）我唔敢諗呢啲，雖然做組合時曾經有段時間好多人關注我，但到我依家單飛加入咗TVB，我就好想借呢個角色，等觀眾知甄詠珊係畀心機嘅，係用個心去演戲、唱歌。」

雖然甄詠珊在戲中惡形惡相，但現實中卻是溫柔而且有情有義的女人，她曾經為照顧車禍重傷的前度男友，而退出娛樂圈四年，回想該段時光，她完全不覺得是艱辛：「佢需要時間去復健，會陪佢行下，有時佢行下就好攰，但其實佢最需要照顧嘅係精神方面，佢好鍾意冷笑話，我會為佢儲低呢啲，再講畀佢氹佢開心。（好影響生活？）佢呢方面有照顧返我，所以我當時有諗過真係退出娛圈，佢知我好辛苦養家，所以都想我畀機會佢照顧我，踏入人生另一階段。」只可惜最後因為家庭背景問題而分手收場。根據報導，她前男友是為屋企的地產生意打工。

最近甄詠珊就公開其新歌《重新出發》，藉此宣佈自己已經收拾好心情：「分手之後真係好迷茫，好彩有認識嘅導演搵我做舞台劇，畀我重返工作，依家我努力學返唱歌，希望可以繼續有進步，想大家覺得我唔係淨係一個花瓶嚟。」

以免大家忘記她本身是一個靚女，貼返一啲佢平時嘅相，睇圖：