郭晉安離巢轉簽王祖藍　睇穿視帝游戲規則：佢要唔俾你絕對可以

《白色強人》好快就會開始拍攝，在劇中擔當男主角的郭晉安飾演一名醫生，在接受《香港01》訪問時，他坦言自己是第一次正式做醫生角色，所以要不斷睇紀錄片學習做手術的過程。

近來有傳他會主力北上發展，已簽王祖藍的經理人公司，他亦承認此事，並補充：「其實無話咩北上南下嘅，藝人應該要擴闊自己發展空間，錢就每個人都想搵，但無機會又點去搵錢呢？即使有個機會係未搵到錢，但可以衍生另一個機會都應該去試，我相信祖藍有呢個能力。」至於是否因為TVB未能幫他發展大陸市場才離開，他則有另一套見解，他說：「每一個機構都有一個方向，如果大家方向唔啱就無謂勉強落去，但個方向TVB唔係做唔到，係絕對做到，不過可能我需要搵一個再合拍啲嘅夥伴去幫我行呢一條路。我會繼續幫TVB拍劇，不過可能就會更少時間。」

安仔由85年加入TVB，在這裡經歷了30年時間（中間離開了三年），期間奪得過3次視帝，跟羅嘉良和黎耀祥一樣保持著獲視帝最多次數的紀錄。問到今年有沒有信心憑《再創世紀》再下一城破紀錄，他說：「呢個係Bonus嚟嘅，你能唔能夠攞到呢樣嘢，有幾個大原則喺裡面，套劇有無迴響，觀眾嘅認受性，同埋最終都係落喺TVB嘅決策入面，佢要唔俾你絕對可以唔俾你。」安仔心水真係好清！