召喚1989的檸檬茶男主角　陽光妹樊亦敏：佢應該轉行做生意

近期引起網友熱烈討論的《波士早晨》ca姐樊亦敏(Amy)，被網友大讚演得又唱得，人又靚女完全唔似46歲，簡直可以被列入「凍齡」女神之一。早於80年代尾已經開始拍廣告，更是經典廣告「陽光檸檬茶」其中一代陽光妹。提到有好多人都想搵返男主角嘅下落，樊亦敏接受《香港01》訪問時就表示同對方失去聯絡，「初初拍完都有聯絡，如果我無幾錯佢之後轉行做生意，再後期仲去咗外國，完全搵唔到佢。」所以大家就只好從廣告中回顧下喇。

1991年當年只有20歲的Amy就參選港姐，雖然未有3甲獎項，但奪得《最上鏡小姐》獎項。睇返當年港姐嘅照片，Amy真係好靚女，以而家嘅terms來說，可以話係「零死角」。同年她就加入了TVB成為旗下藝員，直到1996年約滿離開。

提到拍攝廣告的原因，Amy就指因為小時候都有拍開廣告，「咁啱佢要搵人，之後就casting,導演又ok咁就拍咗。」雖然同廣告中男主角無聯絡，但Amy就笑言反而與廣告中其他演員有聯絡，其後更爆出其實她拍攝過兩輯檸檬茶廣告，「第一代鄭伊健做男主角個輯我都係度，有一幕講女主角見到有個女仔同伊健玩緊，之後就好唔開心，其實個個女仔都係我嚟。」