岑麗香身材keep得fit　至索人妻除咗亞麻籽仲有呢樣秘技

岑麗香日前以一襲鑲滿Swarovski水晶的重工透視高訂晚裝，現身TVB中華小姐選舉，驚艷全城，香香著呢條裙，真係肥少少都carry唔到，香香不嬲身材都fit爆，佢今日出席鐘錶活動時，接受香港01訪問，有透露佢平時點樣修身：「飲多啲唔同嘅果汁，未必日日都飲到，但一有時間就會飲，至少每日一杯，唔同嘅雜果溝埋都得。」

【中華小姐】岑麗香超性感現身成全晚焦點 Fit爆身材完美演繹

網上流傳咗好耐，話香香有一條減肥秘方，就係食亞麻籽，香香回應呢個傳聞時話：「我都有食亞麻籽，間中放喺果汁或者其他食物上，不過就唔係完全靠呢個嚟減肥，而且唔係個個都啱食，巿面有好多唔同嘅健康食品，要試吓適唔適合自己，如果食完無效果就試其他。」而除咗注意飲食之外，香香話都會配合運動，而佢最常做嘅就係拉筋：「基本上得閒就做，拉多啲筋除咗會瘦之外，個人都會精神啲同埋企得直啲。」

其實香香嘅減肥方式都有根據，日本減肥名醫佐藤萬成就最推崇拉筋減肥，佢認為，一味捱餓甚至斷食，令個肚同精神受折磨，但就忽略減肥嘅重點其實係燃燒脂肪，佐藤醫師根據過去的減重指導經驗，再利用科學數據，研發出一套「背部拉筋減肥法」，而佢自己都用個方法幫自己由加大碼減到中碼！拉筋可以增加肌肉量，令個人望落更加Firm，而且有助促進橫隔膜嘅活性，達至按摩內臟的效果，可以改善便秘的情況。

而飲蔬果汁就有排便淨毒嘅效果，有豐富的維他命C、纖維及礦物質，可以促進腸胃蠕動，仲可以改善皮膚，一舉兩得。但注意唔好溝太多種生果，甜度太高的生果如車厘子同提子就盡量避免，盡量用熱量低的蔬菜如紅菜頭或西芹。每個人體質同習慣都唔同，參考其他人嘅減肥方法，學香香話齋，試過唔work唔使氣餒，慢慢搵到適合自己嘅減肥方式，各位姊妹，共勉之！